Punëtorët e Ndërmarrjes Publike Banesore (NPB) kanë protestuar para Gjykatës Supreme, duke kërkuar zgjidhje për situatën në të cilën ndodhen, pasi thonë se kanë mbetur pa paga për dy muaj.
Protestuesit kanë kërkuar që rasti i tyre të trajtohet me prioritet, duke theksuar se vonesat në paga po ndikojnë drejtpërdrejt në jetesën e tyre dhe të familjeve.
“Duam drejtësi! Sot duhet të dëgjohet zëri i mbi 330 punëtorëve. Duhet të dëgjohet nga të gjithë. Paga është një e drejtë, puna është një e drejtë dhe punëtori nuk është vetëm një numër. Familja e punëtorit nuk mund të presë pafundësisht. Ne duam që drejtësia të vihet në vend”, tha njëri nga punëtorët.
Gjatë protestës, punëtorët mbanin pankarta me mbishkrimet “Mos i zvarritni, punëtorët po dëmtohen” dhe “Filloi muaji i tretë pa paga, edhe sa duhet të presim?”.
Njëri nga përfaqësuesit e punëtorëve është takuar edhe me zyrtarë të Gjykatës Supreme, pas takimit me të cilët ka thënë se u është premtuar që lënda do të trajtohet me prioritet.
“Nuk na dhanë datën, por na thanë se me prioritet do ta marrin lëndën tonë dhe do të na respektojnë”, u shpreh ai para gazetarëve.
Pse janë bllokuar llogaritë e NPB-së?
Në gusht të këtij viti, Ndërmarrja Publike Banesore njoftoi se llogaritë e saj bankare janë bllokuar si pasojë e një procedure përmbarimore që lidhet me një kontest gjyqësor.
Ndërkaq, Gjykata Supreme ka bërë të ditur se lënda që lidhet me këtë kontest është pranuar dhe regjistruar më 21 gusht 2026 dhe aktualisht është në shqyrtim.
Bllokimi i llogarive ka ndikuar në gjendjen financiare të ndërmarrjes, ndërsa punëtorët po kërkojnë që çështja të zgjidhet sa më shpejt, në mënyrë që të marrin pagat e papaguara. /Telegrafi/