Aleksandar Vuçiq deklaroi në Konferencën e Ambasadorëve se Serbia mbetet në rrugën evropiane dhe theksoi se Beogradi kishte pritur përparime të mëdha nga administrata e re amerikane, por se në realitet nuk ka mbështetje nga asnjë fuqi e madhe.
Duke folur për përparimet e pritura në marrëdhëniet me Shtetet e Bashkuara të Amerikës, presidenti serb tha se “për momentin Serbia nuk ka mundur t’i ndiejë ato, as sa i përket tarifave, as sa i përket sanksioneve ndaj Industrisë së Naftës së Serbisë”.
Ai ka porositur ambasadorët e Serbisë se duhet të përfaqësojnë politikën shtetërore sipas së cilës Kosova është pjesë e Serbisë, duke theksuar se faktorët rajonalë dhe botërorë kanë nisur një valë të re të njohjeve të pavarësisë së Kosovës, raporton N1.
“Ta dini, çfarëdo që t’ju thonë, çfarëdo që të thirren, asnjë marrëveshje nuk e respektojnë as Prishtina, as Bashkimi Evropian, as Shtetet e Bashkuara të Amerikës, madje as ato që na i kanë imponuar – për ne Kosova është pjesë e Serbisë, kështu ka qenë dhe kështu do të jetë”, tha Vuçiq.
Siç u shpreh ai, bëhet fjalë për pretendime të të tjerëve jo vetëm ndaj territorit të Serbisë, por ndaj gjithë hapësirës rajonale, për këtë arsye Serbia do të duhet të bëjë një punë të vështirë dhe të angazhohet, siç tha ai, në “çnjohje”.
“Ne jemi të shtypur pas murit dhe do ta mbrojmë dhe do ta mbrojmë tonën”, porositi Vuçiq.
Ndryshe, Kosovën së fundi e ka njohur Bahamet, duke u bërë shteti i 121-të që e njeh pavarësinë e vendit tonë. /Telegrafi/