Naim Jakaj nga Instituti i Kosovës për Drejtësi (IKD) ka kritikuar ashpër mënyrën se si Kuvendi i Kosovës i ka miratuar 12 ligje më 5 dhjetor të vitit të kaluar, duke vlerësuar se procedura e ndjekur ka cenuar rëndë demokracinë parlamentare dhe shtetin e së drejtës.
Përmes një reagimi publik, Jakaj ka theksuar se pavarësisht se ligjet e miratuara mund të jenë të mira dhe të rëndësishme për vendin, mënyra e miratimit të tyre ka qenë “fatale” për procedurën parlamentare.
Sipas tij, Gjykata Kushtetuese ka konstatuar disa shkelje serioze në procesin legjislativ, përfshirë miratimin e ligjeve brenda një dite, në lexim të parë dhe të dytë, duke e shndërruar procesin legjislativ në një procedurë formale dhe jo përmbajtësore.
Jakaj ka kritikuar gjithashtu anashkalimin e komisioneve parlamentare, të cilave, sipas tij, u janë dhënë vetëm disa minuta për shqyrtimin e projektligjeve, gjë që ka pamundësuar analizën profesionale dhe substanciale të tyre.
Ai ka vlerësuar se ka munguar debati parlamentar, pasi deputetët nuk kanë pasur kohë të mjaftueshme për të lexuar materialet, për të diskutuar apo për të propozuar amendamente. Po ashtu, është përdorur pa arsye procedura e përshpejtuar, pa ekzistuar situata emergjente apo arsye objektive që do ta justifikonin shmangien nga afatet e rregullta ligjore.
Sipas Jakajt, materialet ligjore janë shpërndarë me vonesë, madje edhe pas fillimit të seancave, duke cenuar transparencën dhe cilësinë e procesit vendimmarrës. Ai ka theksuar se deputetëve u është pamundësuar ushtrimi real i mandatit, duke u reduktuar në votues formalë, pa rol të vërtetë në hartimin e ligjeve.
Në fund, Jakaj ka vlerësuar se kjo mënyrë e miratimit të ligjeve ka cenuar standardet e shtetit të së drejtës, pasi procedurat e shkurtra kanë shkelur parimet e ligjshmërisë, përgjegjshmërisë dhe procesit demokratik./Telegrafi/