Nënkryetari i Partisë Demokratike të Kosovës dhe i dyti në listën zgjedhore, Uran Ismaili, së bashku me kandidatin për kryeministër Bedri Hamza, kanë mbajtur tubim elektoral në lagjen Dardania në Prishtinë.
Në fjalën e tij para qytetarëve, Ismaili tha se PDK në këto zgjedhje ka kandidat një njeri të dëshmuar, i cili i ka dhënë Kosovës vite të tëra shërbimi publik dhe rezultate konkrete.
“Kemi kandidat një njeri të dëshmuar. Një person që i ka dhënë Kosovës shumë, gjithë jetën e vet në shërbimin publik”, tha Ismaili.
Ai theksoi se dallimi i Bedri Hamzës nga kundërkandidatët e të tjerë është besueshmëria e tij, sepse çdo premtim i dhënë më parë është realizuar.
“Kur ka thënë se do t’i rrisë pagat 50%, njerëzit e kanë ditur që ato paga do të rriten. Kur ka thënë se do t’i ulë tatimet, bizneset e kanë ditur që tatimet do të ulen”, u shpreh Ismaili.
Sipas tij, angazhimi i PDK-së është i qartë: bashkimi i qytetarëve dhe largimi nga klima e përçarjes dhe konfliktit që ka mbizotëruar viteve të fundit.
“Angazhimi ynë është me bashku Kosovën, larg kësaj klime të përçarjes e konfliktit, dhe me e kthy vendin në një drejtim përpara, ku secila familje në Kosovë do ta ndjejë përfitimin nga qeverisja e Bedri Hamzës”, përfundoi Ismaili.
