Malisheva po përgatitet që së shpejti të bëjë një goditje të madhe në afatin kalimtar të transferimeve.
Siç ka mësuar Telegrafi, drejtuesit e klubit janë shumë afër arritjes së një marrëveshjeje me futbollistin e talentuar Rion Xhemaili.
Xhemaili, 22-vjeçar, i lindur dhe i rritur në Zvicër, është vëllau binjak i futbollistes së njohur Riola Xhemaili, e cila tashmë përfaqëson Zvicrën në kategorinë e femrave dhe aktualisht është pjesë e gjigantit holandez PSV Eindhoven.
Rioni është produkt i akademisë së Baselit, atje ku kishte kaluar në moshë shumë të hershme nga Solothurni. Për Baselin ai luajti nga grupmoshat U17 deri tek ato U21.
Rion dhe Riola Xhemaili
Për Xhemailin, sipas burimeve të afërta me lojtarin, interesim kanë shprehur disa klube të njohura kosovare, por është Malisheva ajo që ka bërë një hap tutje në negociata dhe se tashmë lojtari ka disa ditë që ka filluar stërvitjet me ta.
Futbollisti i talentuar aktualisht është pjesë e FC Langenthal, një klub në kantonin e Bernit që bën gara në ligën e katërt të futbollit zviceran.
Xhemaili njihet si një futbollist me driblime vdekjeprurëse dhe këmbëshpejtë, por një lëndim i pësuar i ka penguar vazhdimësinë dhe ai tashmë e sheh Superligën e Kosovës si vendin e duhur për të rikthyer formën.
Kujtojmë se Malisheva aktualisht renditet e pesta në Superligën e Kosovës me 27 pikë të grumbulluara dhe transferimi i Xhemailit do të ishte një ndihmesë e madhe drejt arritjes së objektivave./Telegrafi/