Gjatë vitit 2024, remitencat e diasporës kanë vijuar të jenë një burim kyç financiar për vendet e Ballkanit, duke u llogaritur në miliarda euro dhe duke pasur një ndikim të drejtpërdrejtë në ekonomitë kombëtare.
Të dhënat e publikuara nga Eurostat tregojnë se Serbia kryeson listën e vendeve të rajonit për nga vlera e parave të dërguara nga mërgimtarët, ndërsa Mali i Zi renditet në fund, raporton TRT Balkan.
Sipas këtyre të dhënave, diaspora serbe ka dërguar rreth 4.47 miliardë euro gjatë vitit të kaluar, shifër që përfaqëson rreth 5.4 për qind të Prodhimit të Brendshëm Bruto të vendit.
Në vendin e dytë renditet Kroacia me 2.27 miliardë euro remitenca, ose 2.6 për qind të PBB-së.
Bosnje dhe Hercegovina vijon të mbetet ndër vendet më të varura nga remitencat, me rreth 1.99 miliardë euro të dërguara nga diaspora, që përbëjnë 7.6 për qind të PBB-së.
Shqipëria ka përfituar rreth 1.28 miliardë euro nga emigrantët e saj, një shumë që llogaritet në rreth 5.1 për qind të ekonomisë kombëtare.
Ndërkohë, Kosova shënon një nivel të lartë varësie nga remitencat, me rreth 1.32 miliardë euro të dërguara gjatë vitit 2024, që përfaqësojnë afërsisht 12.7 për qind të PBB-së, përqindja më e lartë në rajon.
Mali i Zi ka regjistruar rreth 345 milionë euro remitenca, ose 4.5 për qind të PBB-së, ndërsa Maqedonia e Veriut rreth 310 milionë euro, që përbëjnë rreth 2 për qind të ekonomisë së saj.
Ekspertët vlerësojnë se remitencat mbeten jetike për konsumin familjar, stabilitetin social dhe mbulimin e shpenzimeve bazë në shumë vende të rajonit, edhe pse ndikimi i tyre afatgjatë në zhvillimin ekonomik varet nga mënyra se si këto mjete kanalizohen në investime produktive.
