Hiperaktiviteti, mungesa e përqendrimit dhe sjelljet kompulsive shfaqen më shpesh te disa raca, ndërsa veterinerët paralajmërojnë të mos bëhen “diagnoza” nga rrjetet sociale
Qeni juaj është hiperaktiv, nuk ju dëgjon pothuajse fare, e ka të vështirë të mësojë komanda dhe truke, ha gjëra që nuk duhen ngrënë dhe ndonjëherë nuk arrin të dalë jashtë për të kryer nevojat, por i bën ato në shtëpi? Për shkak të këtyre sjelljeve, mund t’ju ketë shkuar në mendje pyetja: A ka qeni im ADHD?
Ekspertët e sjelljes së kafshëve thonë se ky çrregullim, në formën që shfaqet te njerëzit, nuk diagnostikohet te qentë. Megjithatë, ata theksojnë se ekzistojnë 12 shenja të hershme që mund të tregojnë sjellje të ngjashme me ADHD-në.
Te njerëzit, ADHD-ja është një çrregullim neurozhvillimor që ndikon në aftësinë për t’u përqendruar, për të kontrolluar impulset dhe në nivelin e aktivitetit. Zakonisht nis në fëmijëri dhe mund të vazhdojë edhe në moshë të rritur.
Te disa qen mund të shfaqen sjellje që ngjajnë me këtë gjendje, transmeton Telegrafi.
shutterstock
12 shenja që duhen vëzhguar
1. Qeni refuzon të qëndrojë në vend kur i kërkohet të rrijë i qetë.
2. Nuk pushon së lëvizuri dhe e ka të vështirë të qetësohet.
3. Vrapon tepër dhe kërkon të luajë pothuajse pa ndërprerje.
4. Bëhet shumë i shqetësuar dhe vështirë kontrollohet gjatë shëtitjes.
5. E ka të vështirë të mësojë truke dhe komanda.
6. I shpërqendrohet lehtë vëmendja.
7. Ka vështirësi të përqendrohet.
8. Mund të jetë jashtëzakonisht frikacak.
9. Mund të shfaqë agresivitet.
10. Shfaq sjellje kompulsive.
11. Ha sende që nuk janë ushqim.
12. Kryen nevojat në shtëpi ose në vende të papërshtatshme.
Disa raca mund të jenë më të prira
Disa raca duket se shfaqin më shpesh këto tipare. Mes tyre përmenden:
- Cairn Terrier,
- Jack Russell Terrier,
- Bariu gjerman,
- Staffordshire Bull Terrier,
- Collie me qime të shkurtra,
- Border collie.
Këto sjellje duket se janë më të shpeshta edhe te qentë e rinj dhe te meshkujt, si dhe te ata që kalojnë shumë kohë vetëm në shtëpi.
Mos u mbështetni te “diagnozat” nga TikTok-u
Pronarët nuk duhet t’u vendosin vetë diagnoza qenve duke u bazuar në video apo lista kontrolli nga rrjetet sociale.
Qeni duhet të ketë gjumë të mjaftueshëm, aktivitet fizik, stimulim mendor, trajnim dhe një ambient të qetë e të shëndetshëm.
Nëse sjelljet e theksuara ose të vazhdueshme mbeten edhe pasi këto nevoja plotësohen, këshillohet konsultimi me veterinerin, në vend që të supozohet menjëherë se bëhet fjalë për një problem të caktuar shëndetësor. /Telegrafi/