Një lëvizje e vogël që ruan freskinë dhe teksturën natyrale të lëkurës
Korrektorët me ngjyrë shërbejnë për të neutralizuar nëntonet e padëshiruara të lëkurës dhe për ta përgatitur tenin për hapat e mëtejshëm të grimimit, duke krijuar një bazë të njëtrajtshme dhe të qetë. Por a i aplikoni ato në mënyrën e duhur?
Nëse përdorni korrektor dhe nuk e dini këtë, fytyra duket e lodhur edhe pas grimimit
Roli i korrektorëve me ngjyrë nuk është të mbulojnë si pudra, por të neutralizojnë vizualisht nuancat problematike, duke përdorur rregullat e teorisë së ngjyrave, sipas së cilës ngjyrat e kundërta neutralizojnë njëra-tjetrën. Në këtë mënyrë arrihet një rezultat më natyral sesa kur zonat problematike mbulohen me shtresa të trasha pudre. Ato janë veçanërisht të dobishme te rrathët e theksuar poshtë syve, skuqjet apo njollat, ku korrektorët klasikë shpesh nuk mjaftojnë.
Kur përdoren siç duhet, ato mundësojnë përdorimin e një sasie më të vogël pudre, ndërsa teni duket më natyral, më i freskët dhe më i njëtrajtshëm, transmeton Telegrafi.
Jeshilja kundër skuqjes
Korrektori jeshil përdoret për të neutralizuar skuqjen, si puçrrat, irritimet, rozacea apo shenjat e akneve. Kur aplikohet në një shtresë shumë të hollë, ai zbut intensitetin e ngjyrës së kuqe, kështu që pas aplikimit të pudrës ose korrektorit në ngjyrën e lëkurës, zona problematike pothuajse shkrihet me pjesën tjetër të fytyrës. Është e rëndësishme që korrektori jeshil të përdoret vetëm lokalisht, sepse në të kundërt mund t’i japë lëkurës një pamje gri ose të pajetë.
Pjeshka zbut vjollcën
Korrektorët pjeshkë dhe portokalli përdoren më shpesh në zonën poshtë syve, por edhe për njollat e errëta në fytyrë që kanë nënton blu ose vjollcë. Ata rikthejnë ngrohtësinë në atë pjesë të fytyrës. Nuancat më të çelëta të pjeshkës janë të përshtatshme për ten të çelët dhe rrathë më të lehtë, ndërsa tonet portokalli janë më efektive për ten më të errët dhe hije më të theksuara. Sasia e duhur e produktit është kyçe, sepse teprimi mund të futet në vijat e holla dhe të theksojë teksturën e lëkurës.
E verdha freskon
Korrektori i verdhë përdoret për të freskuar tenin e lodhur dhe me nuancë gri, si dhe për të zbutur hijet vjollcë ose blu, sidomos rreth syve dhe në këndet e brendshme. Ai jep efekt ndriçimi të lehtë dhe ngrohtësie, duke e bërë fytyrën të duket më e pushuar dhe më e shëndetshme.
Vjollca neutralizon të verdhën
Korrektori vjollcë ose livandë shërben për të neutralizuar tonet e verdha të lëkurës dhe përdoret shpesh në sipërfaqe më të mëdha, si balli apo faqet, por gjithmonë në një shtresë shumë të hollë, në mënyrë që teni të marrë freski pa efekt artificial.
Si përdoren
Korrektorët me ngjyrë vijnë në tekstura të ndryshme, nga kremoze deri te të lëngshme, dhe është e rëndësishme të zgjidhni atë që i përshtatet tipit të lëkurës suaj. Formulat kremoze janë më të përshtatshme për lëkurë të thatë dhe normale, ndërsa teksturat më të lehta dhe të lëngshme janë shpesh zgjedhje më e mirë për lëkurë të yndyrshme ose të përzier.
Pavarësisht teksturës, korrektorët aplikohen para pudrës, me goditje të buta me gishta, sfungjer ose furçë, në mënyrë që të shkrihen me lëkurën. Më pas mbi to vendoset korrektor ose pudër në ngjyrën e tenit, duke arritur një përfundim natyral dhe të njëtrajtshëm. Me përdorim të saktë dhe të moderuar të korrektorëve me ngjyrë, grimi duket më i lehtë, teni më i shëndetshëm, ndërsa tekstura natyrale e lëkurës mbetet e dukshme dhe e kuruar. /Telegrafi/