Ndërsa shumica në dimër zgjedhin kombinime të sigurta, me shtresa që shkrihen me grinë urbane, Irina Shayk shkon në drejtim krejtësisht të kundërt
Veshjet e saj të rrugës rregullisht shtyjnë kufijtë e së pritshmes, ndërsa një shëtitje në New York tregoi edhe një herë se moti i ftohtë mund të jetë skena ideale për një eksperiment të guximshëm mode, që bashkon luksin, stilin dhe një ndjeshmëri të pagabueshme ndaj trendeve…
Irina Shayk dëshmoi edhe një herë pse është e pakontestueshme, këtë herë në rrugët e New Yorkut, ku të ftohtin e mposhti me një kontrast spektakolar mode.
Modelja e famshme 39-vjeçare tërhoqi vëmendjen me një pallto voluminoze gëzofi në një nuancë të çelët dhe luksoze, por surpriza e vërtetë e modës fshihej poshtë saj.
Konkretisht, Irina kishte veshur poshtë palltos pantallona ultra të shkurtra, pothuajse tërësisht të fshehura nën shtresat e veshjes dimërore, duke krijuar efektin sikur nën pallto nuk kishte asgjë tjetër, transmeton Telegrafi.
Ky kombinim i glamurit dimëror me siluetën verore konfirmon edhe një herë prirjen e saj për veshje të guximshme, që gjithmonë duken të menduara dhe elegante.
Pamjen e kompletoi me geta të trasha të zeza dhe çizme të shkurtra me detaje karakteristike me majë, nga shtëpia e Junya Watanabe, një markë së cilës Irina i rikthehet shpesh dhe që e zgjedh me dëshirë në paraqitjet e saj jashtë angazhimeve zyrtare.
Pikërisht këto çizme efektive i dhanë një dozë shtesë mode gjithë stilimit dhe konfirmuan prirjen e saj për veshje avangarde dhe të guximshme, me firmën e dizajnerit japonez.
Një bluzë minimaliste e bardhë, një çantë bezhë dhe syze dielli të ngushta e plotësuan këtë pamje, e cila balancon në mënyrë të përkryer mes rehatisë së përditshme dhe elegancës së modës së lartë.
Irina Shayk e shndërroi edhe një herë trotuarin e qytetit në pasarelën e saj personale dhe tregoi se edhe në dimër mund të vishen pantallona ultra të shkurtra, me mjaftueshëm stil, vetëbesim dhe një pallto vërtet të mirë gëzofi. /Telegrafi/
