Dy persona janë arrestuar dhe një tjetër është identifikuar nga policia pas incidentit të ndodhur gjatë ndeshjes së Superligës së Kosovës ndërmjet KB Vëllaznimit dhe KB Bashkimit, e zhvilluar në palestrën “Shani Nushi” në Gjakovë.
Federata e Basketbollit e Kosovës (FBK) ka njoftuar të enjten se Policia e Kosovës ka konfirmuar arrestimin e dy personave për tentim sulmi, ndërsa ndaj personit që ka hedhur shishen me ujë në drejtim të ndihmëstrajnerit të KB Bashkimit, Bledar Gjeqaj, priten veprime të mëtejshme ligjore. Shishja e hedhur goditi Gjeqajn në fytyrë, duke e rrëzuar atë në parket.
Incidenti ndodhi gjatë çerekut të dytë, kur nga tribuna u dëgjuan ofendime në kor ndaj skuadrës mysafire.
Publikut iu dha vërejtje zyrtare, por situata u tensionua kur një grup tifozësh të skuadrës vendase tentoi të sulmonte persona të pranishëm në tribunën e mysafirëve, duke krijuar rrezik serioz për përshkallëzim të situatës.
“Falë ndërhyrjes së Policisë së Kosovës, është parandaluar një incident edhe më i rëndë”, ka deklaruar FBK.
Pas aktit të dhunës, në koordinim me gjyqtarët dhe policinë, u vendos zbrazja e palestrës nga publiku, me përjashtim të zonës VIP, për të garantuar sigurinë e të gjithë akterëve të ndeshjes.
FBK-ja ka cilësuar situatën si alarmante dhe ka paralajmëruar zero tolerancë ndaj dhunës në palestra.
Klubi nikoqir do të ndëshkohet për organizim të dobët të ndeshjes, ndërsa ndaj tij priten masa të rënda disiplinore sipas rregulloreve në fuqi.
Federata theksoi se dhuna fizike, tentimet për sulm, fyerjet dhe çdo sjellje tjetër e papranueshme nuk do të tolerohen dhe paralajmëroi masa edhe më drastike në rast të përsëritjes së incidenteve, përfshirë mbylljen e palestrave, zhvillimin e ndeshjeve pa publik, humbjen e ndeshjeve me rezultat zyrtar dhe referimin e rasteve tek institucionet kompetente./Telegrafi/