Një grua 22-vjeçare e tmerruar u gjet e mbyllur brenda një kafazi qensh në një oborr në Teksas, pasi një fqinj dëgjoi britmat e saj drithëruese për ndihmë.
Policia thotë se viktima, e cila jeton me aftësi të kufizuara fizike dhe mendore, ishte futur në kafaz natën e 22 nëntorit, duke bërtitur se ishte e frikësuar dhe kishte nevojë të përdorte banjën.
Fqinji Justin Anderson, 24 vjeç, i dëgjoi lutjet e saj për ndihmë dhe shpejt e kuptoi se tingujt që vinin nga dera fqinje nuk ishin shqetësim i zakonshëm.
“Dëgjova diçka që nuk tingëllonte aspak mirë”, ka thënë Anderson për Daily Mail, përcjell Telegrafi.
Ai nxori telefonin e tij, eci drejt gardhit dhe filloi të filmonte skena që tani përshkruhen nga autoritetet si një grua e mbyllur në kafaz si një kafshë, duke goditur derën e kafazit, duke u lutur të dilte.
Pamjet filmike dhe thirrja e Anderson në 911, i shtynë oficerët të nxitonin në shtëpinë e 60-vjeçares Kandice ‘Candy’ Thompson, një grua e njohur në Anson për kujdesin e dhjetëra fëmijëve gjatë viteve dhe për faktin se ishte e veja e një ish-shefi policie.
Ajo që oficerët gjetën pas gardhit prej druri, tha më vonë Shefi i Policisë së Anson, Daniel Graziose, ishte ‘tronditëse’.
‘Oficerët reaguan dhe gjetën një femër 22-vjeçare të mbyllur në oborrin e shtëpisë,’ konfirmoi Graziose për Criminally Obsessed.
Thompson ofroi justifikime pse gruaja ishte mbyllur jashtë, por hetuesit tani e kanë akuzuar atë për rrëmbim të rëndë, lëndim të një personi me aftësi të kufizuara, kufizim të paligjshëm, rrezikim dhe sulm.
Dhe policia thotë se videoja e Anderson mund t’i ketë shpëtuar jetën Emily-t. /Telegrafi/
