Raportohet se trupi i pajetë i 5-vjeçarit, Tian Rahimi është gjetur në lumin Reuss, disa ditë pas aksidentit tragjik me varkë në kantonin Aargau.
Pas një operacioni të gjerë kërkimi që zgjati disa ditë, ku morën pjesë policia, ekipet e shpëtimit, zhytësit dhe rreth 200 vullnetarë, autoritetet zvicerane kanë bërë të ditur se fëmija është gjetur i pajetë, shkruan 20 minuten.
Zëdhënësi i policisë kantonale të Aargaut, Dominic Zimmerli, tha se: “Sipas të dhënave të para, duket se bëhet fjalë për djalin 5-vjeçar të zhdukur që nga e shtuna. Megjithatë, identifikimi zyrtar ende nuk është kryer”.
Operacioni i kërkimit ishte zhvilluar përgjatë gjithë segmentit të lumit Reuss në zonën e Mühlau, ndërsa shpresat për gjetjen e gjallë të fëmijës ishin zbehur me kalimin e kohës.
Policia kantonale e Aargaut pritet të japë më shumë detaje rreth identifikimit dhe rrethanave të sakta të ngjarjes.
Sipas raportimeve të mediave zvicerane, aksidenti kishte ndodhur të shtunën, kur familja katër anëtarëshe po lundronte me një varkë gome në lumin Reuss.
Varka është përplasur me një pemë të rënë në ujë dhe është përmbysur.
Të dy prindërit dhe vajza 7-vjeçare arritën të shpëtonin dhe dolën në breg, ndërsa djali 5-vjeçar u zhduk në ujërat e lumit. /Telegrafi/