Federata Portugeze e Futbollit (FPF) ka konfirmuar zyrtarisht se kapiteni Bernardo Silva është liruar nga grumbullimi i kombëtares dhe nuk do të jetë i gatshëm për ndeshjen e së martës kundër Uellsit në kuadër të Ligës së Kombeve.
Përmes një komunikate zyrtare, FPF ka sqaruar se largimi i mesfushorit ka ardhur për arsye fizike, duke hedhur poshtë spekulimet e tjera.
“Bernardo Silva u vlerësua klinikisht dhe u konsiderua i papërshtatshëm nga Drejtoria e Shëndetit dhe Performancës së FPF-së, dhe për këtë arsye u lirua”, thuhet në njoftimin e federatës, shkruan IndeksOnline.
Përveç Silvas, i cili shënoi golin e vetëm të Portugalisë në humbjen e rëndë 4-1 ndaj Danimarkës të shtunën, nga kampi stërvitor janë larguar edhe Ruben Dias dhe Joao Palhinha, të cilët janë të pezulluar për shkak të kartonëve të verdhë.
Kështu, përzgjedhësi Jorge Jesus do të ketë 24 futbollistë në dispozicion për duelin vendimtar në Cardiff, ku Portugalisë i mjafton edhe një barazim për të siguruar vendin e parë në Grupin A4 dhe kualifikimin në çerekfinale.
Skuadra portugeze kreu sot seancën e fundit në Braga para nisjes drejt Uellsit, ku nesër në orën 19:45 do të zbresë në fushën e “Cardiff City Stadium” për të lënë pas humbjen më të rëndë në shtëpi në ndeshje zyrtare.

