Të hënën, Barcelona publikoi një njoftim mjekësor në lidhje me Frenkie de Jong dhe Pau Cubarsí.
De Jong ka pësuar një tërheqje të muskulit obturator, por klubi katalanas konfirmoi se ai do të jetë i gatshëm për ndeshjen kundër Villarrealit.
Pau Cubarsí vuan nga një mbingarkesë në muskulin iliopsoas. Ecuria e tij do të përcaktojë nëse ai do të mund të luajë kundër Villarrealit.
Sipas gazetës “Sport”, Cubarsí nuk është përjashtuar ende nga mundësia për të luajtur. Ditët në vijim do të jenë vendimtare, ndërsa trajneri Hans Flick do të marrë vendimin përfundimtar për lojtarin.
De Jong mbërriti në Barcelonë të dielën, pasi u largua nga grumbullimi me kombëtaren e Holandës për shkak të disa problemeve fizike.
Ai u pa duke ecur normalisht me të mbërritur në qytetin katalanas, një shenjë pozitive në lidhje me dëmtimin. Mesfushori kishte ngjallur shqetësim kur Federata Mbretërore Holandeze e Futbollit njoftoi se ai nuk do të udhëtonte drejt Berlinit për ndeshjen kundër Gjermanisë.
Ekzaminimet mjekësore kanë konfirmuar se dëmtimi nuk është serioz. Flick do të mund të llogarisë te mesfushori holandez për ndeshjen kundër Villarrealit, e planifikuar për të dielën e ardhshme./IndeksOnline/

