E vetmja gjë që duhet ta dini për këtë trend bukurie është se kërkon pak më shumë kujdes dhe mirëmbajtje, por efekti përfundimtar ia vlen
Ngjyra vanilje mund të mos jetë ndër më të lehtat për t’u mirëmbajtur, por krijon një efekt të menjëhershëm “wow” dhe i jep freski pothuajse çdo modeli flokësh.
Nëse po mendoni për një ndryshim të dukshëm këtë sezon, ky mund të jetë propozimi ideal. Sipas Glamour, pas muajve të verës, kur flokët ekspozohen ndaj diellit, detit dhe kripës, shumë gra kërkojnë një pamje më të freskët, qoftë përmes një prerjeje të re apo një ngjyre që ndryshon tërësisht imazhin.
Një nga nuancat është pikërisht biondja vanilje. Ajo është parë edhe te modelja Gabriela Borges, së cilës kjo ngjyrë i përshtatet në mënyrë të veçantë.
Pas kësaj nuance qëndron eksperti brazilian i flokëve biondë, Romeu Felipe. Ngjyra krijohet nga një kombinim i nëntoneve të ftohta me tone më të ngrohta, duke dhënë një rezultat elegant dhe shumëdimensional.
Një tjetër veçori është se rrënja mbetet pak më e errët, ndërsa gjatësia dhe majat bëhen gradualisht më të çelëta. Pikërisht ky kontrast i butë e bën ngjyrën të duket më natyrale dhe i jep flokëve më shumë thellësi.
Në thelb, bëhet fjalë për një transformim që mund ta freskojë një model ekzistues flokësh dhe ta ndryshojë dukshëm pamjen për sezonin e ri.
Megjithatë, duhet pasur parasysh se biondja vanilje nuk është shumë e thjeshtë për t’u mirëmbajtur. Ajo kërkon vizita më të shpeshta në sallon sesa disa prej teknikave të tjera të ngjyrosjes që kanë qenë në modë vitet e fundit.
Për ta kuptuar sa kompleks mund të jetë procesi, mjafton një detaj: Romeu Felipe-it iu deshën rreth 12 orë për të krijuar nuancën e modeles Gabriela Borges.
Pra, është një zgjedhje që kërkon kohë dhe përkushtim, por për ata që duan një ndryshim të dukshëm, të freskët dhe modern, biondja vanilje mund të jetë një nga ngjyrat më interesante të kësaj vjeshte. /Telegrafi/