Dorëheqja e Donika Gërvallës është një nga kërkesat e protestuesve që janë mbledhur sot në sheshin “Skënderbeu” në Prishtinë, në protestën kundër vendimit të Gjykatës Speciale.
Këtë kërkesë e ka përmendur edhe kryetari i OVL të UÇK-së, Hysni Gucati, i cili para protestuesve kërkoi që kryeministri Albin Kurti ta largojë Gërvallën nga qeveria.
“Ne e dimë se Donika ka dorëzuar dokumentacione në Hagë. I themi Kurtit që nga sot t’i përjashtojë këta njerëz që bashkëpunojnë me armikun. Janë armiq të vendit tim dhe ne nuk i duam në mesin tonë”, tha Gucati.
Ai kërkoi gjithashtu që Gërvalla të japë sqarime lidhur me veprimet e saj, duke thënë se protestuesit janë të befasuar edhe nga heshtja e institucioneve të vendit.
Gucati tha se një tjetër kërkesë e protestuesve është shfuqizimi i vendimit të Gjykatës Speciale. /Telegrafi/