Kryetari i Bashkimit Demokratik për Integrim (BDI), Ali Ahmeti, e ka cilësuar të padrejtë dhe thellësisht zhgënjyes vendimin e Gjykatës Speciale ndaj Hashim Thaçit, Jakup Krasniqit, Kadri Veselit dhe Rexhep Selimit.
Ahmeti ka bërë thirrje për maturi dhe unitet, duke theksuar se nuk duhet të lejohet krijimi i tensioneve, përçarjeve apo njollosja e luftës së UÇK-së.
“Vendimi i sotëm ndaj Hashim Thaçit, Jakup Krasniqit, Kadri Veselit dhe Rexhep Selimit është një vendim që e konsideroj të padrejtë dhe thellësisht zhgënjyes”, ka shkruar Ahmeti.
Ai ka rikujtuar pretendimet e dikurshme për trafikim organesh, duke thënë se ato nuk u shndërruan në akuza në këtë proces.
Ahmeti ka theksuar gjithashtu se, sipas tij, Gjykata Speciale i ka shpallur të pafajshëm të akuzuarit për krime kundër njerëzimit, ndërsa ka përmendur edhe konstatimin se UÇK-ja kishte si objektiv pavarësinë e Kosovës.
“Procesi nuk përfundon këtu. Besojmë se mbrojtja do ta vazhdojë betejën juridike në Gjykatën e Apelit, duke kundërshtuar gjetjet e shkallës së parë dhe duke kërkuar drejtësi deri në fund”, ka deklaruar ai.
Në fund, Ahmeti ka thënë se lufta e UÇK-së ishte luftë për liri dhe se, sipas tij, historia e Kosovës nuk mund të rishkruhet.
“Lufta e UÇK-së ishte luftë për liri. Historia e Kosovës nuk mund të rishkruhet dhe sakrifica e një populli të tërë nuk mund të vihet në bankën e të akuzuarve”, ka shkruar Ahmeti./Telegrafi/