Ish-sulmuesi i Barcelonës, Julio Salinas, ka kritikuar klubin katalunas për lejimin e largimit të mbrojtësit Inigo Martinez, duke e cilësuar këtë vendim si një gabim.
Në një prononcim për mediumin Mundo Deportivo, ish-futbollisti spanjoll ka thënë se Barcelona është dashur të bëjë më shumë për ta mbajtur qendërmbrojtësin, madje duke i ofruar një kontratë të re dyvjeçare.
“Largimi i Inigo Martinezit ishte një gabim. Unë do ta kisha bindur të qëndronte duke ia zgjatur kontratën edhe për dy vjet”, deklaroi Salinas.
Megjithatë, ish-sulmuesi beson se Barcelona vazhdon të ketë alternativa cilësore në repartin defensiv.
Ai ka veçuar në veçanti Pau Cubarsin dhe Eric Garcian, por mendon se përvoja e Martinezit ishte e rëndësishme për skuadrën dhe se klubi nuk është dashur të lejojë largimin e tij.
Deklarata e Salinas vjen në një kohë kur vendimet e Barcelonës në afatin kalimtar të transferimeve dhe ndërtimin e repartit defensiv vazhdojnë të jenë temë diskutimi./Telegrafi/

