Në Konferencën e 20-të Botërore të Qyteteve Historike, të mbajtur në Himeji të Japonisë, Komuna e Gjakovës u pranua zyrtarisht si anëtare e re e Ligës së Qyteteve Historike.
Kështu ka deklaruar kreu i kësaj komune, Ardian Gjini përmes një njoftimi në rrjetin social në Facebook.
Postimi i plotë:
Nga Himeji në Kyoto, Gjakova bëhet pjesë e familjes së qyteteve historike të botës!
Në Konferencën e 20-të Botërore të Qyteteve Historike, të mbajtur në Himeji të Japonisë, Komuna e Gjakovës u pranua zyrtarisht si anëtare e re e Ligës së Qyteteve Historike.
Gjatë punimeve të konferencës, para pjesëmarrësve në konferencë prezantova historinë dhe trashëgiminë kulturore të Gjakovës, si dhe fola për gatishmërinë tonë për bashkëpunim me qytetet e tjera anëtare. Vizitën zyrtare e përmbyllëm në Kyoto, ku në darkën e shtruar nga Kryetari i Kyotos, mbajta fjalën përmbyllëse.
Takimet e zhvilluara me kryetarë të qyteteve japoneze dhe përfaqësues të vendeve të tjera hapin rrugë për shkëmbim të përvojave dhe projekte konkrete në fushën e kulturës, turizmit dhe zhvillimit ekonomik. Njëkohësisht, kjo pjesëmarrje përbën një kontribut të rëndësishëm për prezencën e Republikës së Kosovës në mekanizmat ndërkombëtarë.
Falënderoj organizatorët për mikpritjen, si dhe Ambasadën e Republikës së Kosovës në Tokio, në veçanti Zëvendësshefin e Misionit, z. Arbër Mehmeti, për mbështetjen dhe bashkëpunimin e ngushtë në realizimin e kësaj vizite.