Klestor Veseli, djali i ish-kryetarit të Kuvendit, Kadri Veseli, ka thënë se familja e tij nuk e ka humbur besimin në botën perëndimore dhe drejtësinë e saj.
Në shkallën e parë, Veseli u dënua me 18 vjet burgim nga Dhomat e Specializuara në Hagë. Ai u dënua për disa akuza, ndërsa ajo për krime kundër njerëzimit është hedhur poshtë.
Ai, gjatë protestës gjithëpopullore në mbështetje të ish-krerëve të UÇK-së, ka kërkuar korrigjimin e siç tha ai, gabimit të ndikuar nga politika.
“Nuk e kemi humbur besimin te bota perëndimore, tek drejtësia e tyre. Ne vetëm po kërkojmë korrigjim të një gabimi që ka qenë i zhytur në politikë. Faleminderit edhe juve që po i kushtoni kaq shumë vëmendje kësaj pune”, tha Veseli.