Studentët protestues të Serbisë të dielën mblodhën nënshkrime në të gjithë vendin për kërkesën e tyre për zgjedhje të parakohshme parlamentare, të cilat shpresojnë se do të rrëzonin nga detyra qeverinë autokratike të presidentit Aleksandar Vuçiq, shkruan AP.
Duke përballuar motin e acartë, studentët ngritën gati 500 tenda në dhjetëra qytete, qyteza dhe fshatra që banorët të nënshkruanin kërkesën për zgjedhje, e cila nuk është një peticion formal.
Studentët kanë thënë se veprimi i së dielës kishte për qëllim të ushtronte presion të mëtejshëm mbi Vuçiqin dhe si një provë mbështetjeje, transmeton Telegrafi.
Protestuesit e rinj kanë qenë në ballë të një lëvizjeje mbarëkombëtare kundër sundimit populist të Vuçiqit në Serbi. Më shumë se një vit protestash në rrugë filluan për herë të parë në nëntor 2024 pas një katastrofe në stacionin e trenit që vrau 16 persona.
Rënia e çatisë së betonit në qytetin verior të Novi Sadit u fajësua gjerësisht për korrupsionin e supozuar të përhapur dhe shpërfilljen e rregullave të ndërtimit dhe sigurisë gjatë punimeve të rinovimit në stacion. Askush nuk është mbajtur përgjegjës për tragjedinë.
Vuçiq ka refuzuar të caktojë një votim të menjëhershëm të parakohshëm, por ka sugjeruar se ai mund të mbahet diku vitin tjetër. Zgjedhjet parlamentare dhe presidenciale pritet të mbahen në vitin 2027.
“Ne kemi tenda që shërbejnë për t’u lidhur me qytetarët”, tha Igor Dojnov, një student që drejton një nga pikat në qendër të Beogradit.
Protestat e udhëhequra nga të rinjtë gjatë vitit të kaluar e kanë tronditur Vuçiqin më shumë se kurrë gjatë mandatit të tij 13-vjeçar.
Kryeministri populist i Serbisë dha dorëheqjen në janar dhe Vuçiq më vonë nisi një goditje ndaj protestuesve që tërhoqi edhe kritika ndërkombëtare.
Ndërsa protestat në rrugë janë qetësuar, pakënaqësia me qeverinë e Vuçiqit besohet të jetë e përhapur.
Milca Cankovic Kadijevic, një banore e Beogradit, tha se i mbështeti studentët, sepse “kam dëshirë të jetoj mirë – unë, fëmijët e mi dhe nipërit e mbesat e mia”.
Vuçiq ka premtuar zyrtarisht se do ta çojë Serbinë në Bashkimin Evropian, por ka mbajtur lidhje të ngushta me Rusinë dhe Kinën, ndërsa përballet me akuza për shtypjen e lirive demokratike dhe lejimin e lulëzimit të korrupsionit dhe krimit të organizuar.
Ai e ka mohuar këtë dhe i ka akuzuar protestuesit se po përpiqen të orkestrojnë një “revolucion me ngjyra” nën urdhra të paspecifikuar nga Perëndimi.
Termi “revolucion me ngjyra” është përdorur për të përshkruar një seri protestash masive në fillim të shekullit të 21-të që nganjëherë çuan në rrëzimin e qeverive në ish-shtetet e Bashkimit Sovjetik, ish-Jugosllavinë, Lindjen e Mesme dhe Azinë. /Telegrafi/