Stephen Curry ka rinovuar kontratën me Golden State Warriors, duke nënshkruar një marrëveshje të re dyvjeçare në vlerë prej 116 milionë dollarësh.
Kontrata e re, e cila përfshin edhe një opsion lojtari për sezonin 2028/29, e mban yllin amerikan në Golden State dhe mund t’i japë fund karrierës së tij 20-vjeçare në NBA me të njëjtin klub.
Curry, 38-vjeçar, do të fitonte 62.5 milionë dollarë gjatë sezonit të ardhshëm dhe më pas do të bëhej lojtar i lirë. Megjithatë, ai ka zgjedhur të vazhdojë aventurën me Warriors.
Marrëveshja është rreth 20 milionë dollarë më e ulët sesa shuma maksimale për të cilën Curry ishte i kualifikuar, por i jep Golden State më shumë hapësirë financiare për të bërë përforcime në verën e ardhshme.
Curry kishte thënë më herët se situata rreth kontratës nuk do të ndikonte te paraqitjet e tij apo te skuadra.
“Nuk dua që të ketë dramë”, kishte deklaruar ai.
Konsideruar si gjuajtësi më i madh për treshe në historinë e NBA-së, Curry do të tentojë të udhëheqë Warriors drejt një tjetër gare për titull. Ai tashmë ka katër unaza kampioni, por Golden State nuk ka arritur të fitojë titull që nga sezoni 2021/22.
Warriors kanë munguar në fazën play-off në dy nga katër sezonet e fundit, ndërsa edicionin e kaluar e përfunduan me bilanc negativ prej 37 fitoreve dhe 45 humbjeve.
Edhe për Curry, dy sezonet e fundit kanë qenë të pazakonta sa i përket efikasitetit nga distanca. Për herë të parë në karrierën e tij, ai ka realizuar 40 për qind ose më pak nga treshet në dy sezone radhazi.
12 herë All-Star, Curry gjithashtu luajti vetëm 43 ndeshje sezonin e kaluar për shkak të disa lëndimeve, përfshirë problemet me gjurin, dëmtimin e kockës dhe një lëndim në kuadricepsin e majtë.
Curry ka nevojë për vetëm 141 pikë për të hyrë në 20-shen e parë të të gjitha kohërave në këtë kategori, ndërsa i duhen edhe 353 asistime për të arritur të njëjtin nivel.
Dy herë MVP i NBA-së ka mundësinë t’i bashkohet LeBron James, James Harden dhe Oscar Robertson si lojtarët e vetëm në historinë e ligës që renditen në top 20 si për pikë, ashtu edhe për asistime.
Golden State Warriors do ta nisin sezonin 2026/27 më 21 tetor, ndaj Los Angeles Lakers./Telegrafi/