Të shtunën, dhuna shpërtheu në mbarë Francën gjatë ditës së fundit të demonstratave kundër standardeve në arsim dhe kostos së jetesës.
Të paktën 400 persona u arrestuan gjatë asaj që qeveria franceze e përshkroi si një “përshkallëzim të dhunës”, ndërsa rreth 550,000 njerëz dolën në rrugë.
Në Paris, deri në orët e mbrëmjes pati përleshje të ashpra me policinë e rendit, e cila përdori gaz lotsjellës dhe topa uji ndaj turmës.
Në kryeqytet dhe në zona të tjera u vunë zjarre në ndërtesa; ndër to edhe në Limoges, ku një zjarr i madh në bashki bëri që çatia të shembej pjesërisht, shkruajnë mediat e huaja, përcjell Telegrafi.
Në disa qytete pati grabitje, si dhe akte të përhapura vandalizmi të drejtuara kundër bashkive dhe bizneseve.
Ministri i Brendshëm i Francës, Laurent Nuñez, deklaroi se gjashtëdhjetë oficerë të forcave të rendit mbetën të plagosur; dy prej tyre u dërguan në spital pa ndjenja.
Në Paris, gjatë pasdites, marshimi kryesor dukej kryesisht paqësor.
Një grup të rinjsh i thanë BBC-së se ishin “paqësorë” dhe se “thjesht po përpiqen të sjellin ndryshime, por asgjë nuk po lëviz”.
Megjithatë, me kalimin e kohës, disa grupe ndezën zjarre në rrugë dhe dogjën automjete, përfshirë edhe në vende simbolike të qendrës së qytetit, siç është sheshi “Place de la République”.
Dyqane u plaçkitën, të paktën një restorant u shkatërrua plotësisht nga zjarri, ndërsa BBC-ja vërejti përleshje që shpërthyen midis disa prej grupeve.
Policia e rendit u pa duke ndërhyrë me forcë ndaj një turme në qendër të Parisit, duke goditur disa persona me shkopinj gome.
Në Lion, kryetari i bashkisë Grégory Doucet e quajti djegien e zyrës turistike të qytetit “një tragjedi” për qytetin, duke deklaruar për BFMTV: “Kjo na thyen zemrën, sepse është një ndërtesë historike shumë ikonike dhe e njohur”.
Policia vendore njoftoi se “individë armiqësorë” penguan zjarrfikësit që të ndërhynin në mënyrë të sigurt për të shuar flakët.
Ekipet e zjarrfikësve luftuan gjithashtu me zjarrin në bashkinë e Limozhit (Limoges); sipas prefekturës vendore, zjarri shkaktoi shembjen e një pjese të ndërtesës.
Bashkia e Limozhit u “shkatërrua në masë të madhe” nga zjarri, njoftoi prefektura.
Një i ri “humbi dorën nga shpërthimi i një granate” në Saint-Étienne, bëri të ditur në rrjetet sociale kryetari i bashkisë së këtij qyteti në juglindje, Régis Juanico, duke shtuar: “Një tragjedi e tillë nuk duhet të kishte ndodhur kurrë”.
Ministria e Brendshme deklaroi se protestat përfshinë “akte të qëllimshme dhune” nga “individë të maskuar” në vende të ndryshme, përfshirë pjesë të kryeqytetit. /Telegrafi/