Raporti i gjyqtarit Ricardo de Burgos Bengoetxea për përjashtimin e Facundo Bernalit në ndeshjen mes Real Betisit dhe Barcelonës mund t’i sjellë mesfushorit uruguaian një dënim të rëndë.
Sipas raportit të gjyqtarit, Bernal e kapi Lamine Yamalin për qafe dhe e goditi dy herë radhazi me kokë në fytyrë, gjatë një përplasjeje mes lojtarëve, kur topi nuk ishte në lojë.
“Minutën e 54-t, lojtari Facundo Bernal u përjashtua për arsyen e mëposhtme: gjatë një konfrontimi, ai e kapi një kundërshtar për qafe dhe e goditi dy herë radhazi me kokë në fytyrë, kur topi nuk ishte në lojë”, thuhet në raportin e gjyqtarit.
Raporti thekson gjithashtu se Lamine Yamal nuk pati nevojë për ndihmë mjekësore dhe mundi ta vazhdonte ndeshjen.
Sipas Mundo Deportivo, në bazë të nenit 103 të rregullores disiplinore, Bernal rrezikon të dënohet me katër deri në 12 ndeshje, nëse veprimi i tij cilësohet si agresion. Nëse do të ishte shkaktuar lëndim, dënimi mund të ishte edhe më i rëndë.
Raporti përmban edhe një incident tjetër: drejtori teknik i Betisit, Manuel Fajardo Mateo, thuhet se goditi me këmbë një top pranë gjyqtarit të katërt, i cili e goditi këtë të fundit në këmbë, por pa forcë.
Nëse Fajardo ka licencë zyrtare, mund të përballet me masa disiplinore; përndryshe, mund të ndëshkohet klubi.
Barcelona fitoi 5-2 ndaj Betisit, në një ndeshje të shoqëruar me polemika për vendimet e arbitrimit. /Zëri