Ministria e Financave ka publikuar në Gazetën Zyrtare Udhëzimin Administrativ (MF) Nr. 03/2026, përmes të cilit plotësohet dhe ndryshohet Udhëzimi Administrativ i vitit 2018 për vlerësimin e rrezikut kombëtar për pastrimin e parave dhe financimin e terrorizmit.
Udhëzimi i ri, i nënshkruar nga ministri i Financave, Hekuran Murati, përcakton plotësime në raportimin mbi strukturën institucionale dhe procedurat që lidhen me parandalimin e pastrimit të parave dhe luftimin e financimit të terrorizmit, raporton IndeksOnline.
Konkretisht, përmes nenit 3 të këtij udhëzimi, në nenin 4 të udhëzimit bazë shtohen dy paragrafë të rinj, 1.6 dhe 1.7.
Paragrafi 1.6 parasheh raportimin mbi strukturën institucionale dhe procedurat e përgjithshme të regjimit për parandalimin e pastrimit të parave dhe luftimin e financimit të terrorizmit. Në këtë raportim përfshihen, ndër të tjera, Njësia e Inteligjencës Financiare, autoritetet tatimore dhe prokuroritë, si dhe burimet njerëzore dhe financiare të ndara për këto institucione, për aq sa informacioni është në dispozicion.
Ndërkaq, paragrafi 1.7 parasheh raportimin mbi përpjekjet kombëtare dhe burimet e alokuara për luftimin e pastrimit të parave dhe financimit të terrorizmit, përfshirë resurset njerëzore dhe buxhetin.
Sipas Ministrisë së Financave, qëllimi i këtij udhëzimi është plotësimi dhe ndryshimi i aktit të vitit 2018, ndërsa me të transpozohet plotësisht edhe Direktiva e Bashkimit Evropian 2015/849, e ndryshuar me Direktivën (BE) 2018/843, që lidhet me parandalimin e përdorimit të sistemit financiar për pastrimin e parave dhe financimin e terrorizmit.