Qeveria irlandeze ka paralajmëruar për një “fushatë të mundshme të koordinuar të ndërprerjes së rendit dhe shkaktimit të kaosit”, në një deklaratë lidhur me kërcënimet e fundit për vendosjen e bombave në fluturimet evropiane, pas kërcënimeve të ngjashme që iu drejtuan disa organizatave mediatike në Irlandë.
Në një deklaratë zyrtare, Qeveria irlandeze i cilësoi si shumë serioze kërcënimet e bëra këtë mëngjes ndaj organizatave mediatike në vend, raporton The Guardian.
“Kërcënimet e bëra këtë mëngjes ndaj organizatave mediatike këtu janë shumë serioze. Kërcënimet e rreme të këtij lloji shkaktojnë frikë, shqetësim dhe pengesa për njerëzit që vazhdojnë jetën dhe aktivitetet e tyre të përditshme. Ato nuk sjellin asnjë të mirë. Ende nuk dihet se kush qëndron prapa këtyre kërcënimeve, nëse bëhet fjalë për individë apo për një përpjekje të centralizuar ose të koordinuar. Megjithatë, këto kërcënime vijnë pas ndërprerjeve të vazhdueshme të trafikut ajror në Evropë, të shkaktuara nga kërcënime të ngjashme, dhe duket se ka gjasa që të bëhet fjalë për një fushatë të koordinuar për të shkaktuar pengesa dhe kaos”, thuhet në deklaratë.
Qeveria bëri të ditur se Policia irlandeze, në bashkëpunim me Forcat e Mbrojtjes, autoritetet e sigurisë kibernetike dhe ato të aviacionit, po punojnë për të identifikuar personat përgjegjës.