Kuvendi Komunal i Kamenicës ka miratuar Buxhetin Komunal për vitin 2027, në vlerë prej 15,329,208 eurosh, si dhe parashikimet buxhetore për vitet 2028–2029.
Buxheti është miratuar në mbledhjen e tetë të rregullt të Kuvendit Komunal, me 17 vota për.
Gjatë prezantimit të projektbuxhetit, kryetari i Komunës së Kamenicës, Kadri Rahimaj, tha se hartimi i tij është bërë duke respektuar procedurat ligjore dhe duke marrë parasysh kërkesat e qytetarëve të paraqitura gjatë dëgjimeve buxhetore.
“Buxheti që iu është ardh si projekt propozim për këtë seancë të Kuvendit Komunal është rezultati i punës profesionale të drejtorive dhe komunikimit të shëndosh me qytetarët e Komunës sonë. Lista e projekteve kapitale ka gjithsej 27 projekte. Nga ato janë 8 projekte të reja kapitale. Ndërsa kjo listë është shpërndarë ose ndërtu në dy komponentë, atë të mbulimit të obligimeve nga kontratat e lidhura tashmë nga Komuna e Kamenicës dhe komponenta e dytë është krijimi i kodeve të reja për financim të projekteve të reja”, ka thënë Rahimaj.
Sipas tij, projektbuxheti synon të balancojë prioritetet e qytetarëve me mundësitë financiare të komunës, duke përfshirë edhe projekte të reja kapitale.
Një prej prioriteteve të përmendura nga Rahimaj është krijimi i transportit publik në Komunën e Kamenicës. Ai tha se ky investim do të ndikonte në përmirësimin e komunikimit ndërmjet qytetit dhe fshatrave, si dhe në zhvillimin ekonomik lokal.
Në fund të diskutimeve, projektbuxheti mori mbështetjen e 17 asambleistëve dhe u miratua në vlerë prej 15,329,208 eurosh, ndërsa u miratuan edhe parashikimet buxhetore për vitet 2028–2029.
Në mbledhjen e Kuvendit Komunal janë shqyrtuar edhe disa pika të tjera, përfshirë dhënien e pëlqimit paraprak për shfrytëzimin afatgjatë të disa pronave të paluajtshme komunale në Zonën Kadastrale të Kamenicës, formimin e komisionit vlerësues për këto prona, si dhe subvencionimin e transportit lidhës për fshatin Kopërnicë.
Në kuadër të pikës “Të ndryshme”, kryesuesja e Kuvendit Komunal, Arbnore Beqiraj-Fera, ka paraqitur edhe dy informata.
E para lidhej me procesin e vlerësimit të punimeve për dizajnimin e stemës së Komunës së Kamenicës. Komisioni vlerësues ka konstatuar se asnjë nga aplikuesit nuk i ka përmbushur të gjitha kriteret e përcaktuara në thirrjen publike. Asambleistët janë pajtuar me këtë vlerësim.
Ndërkaq, informata e dytë kishte të bënte me mënyrën e monitorimit të performancës së anëtarëve të Kuvendit Komunal. Sipas njoftimit të komunës, ky proces do të realizohet nga konsorciumi i përbërë nga Instituti Kosovar për Qeverisje Lokale, Instituti GAP, ATRC dhe CBM. /Telegrafi/