Një frigorifer i shndërruar në një vitrinë të vërtetë për shitjen e lëndëve narkotike është zbuluar nga policia në Bergamo të Italisë. Në pranga ka përfunduar një 23-vjeçar, shtetas italian me origjinë shqiptare, të cilit iu gjetën rreth 15 kilogramë hashash dhe marihuanë.
Gjatë kontrollit në banesën e të riut, efektivët e policisë zbuluan një frigorifer ku lëndët narkotike ishin sistemuar në kavanoza të mbyllur hermetikisht, të ndara sipas llojeve dhe të pajisura me etiketa identifikuese. Organizimi i tyre krijonte pamjen e një supermarketi të vogël droge.
Përveç lëndëve narkotike, policia sekuestroi edhe një numër të konsiderueshëm vaporizatorësh për cigaret elektronike, që dyshohet se përdoreshin për konsumimin e ekstrakteve narkotike, si dhe mbi 10 mijë euro para të gatshme.
Zbulimi u bë nga efektivët e Skuadrës së Lëvizshme të Bergamos, pas një hetimi për aktivitetin e dyshuar të shitjes së drogës, shkruan Ansa, transmeton Telegrafi.
23-vjeçari u arrestua më 10 nëntor, ndërsa ndaj tij rëndon akuza e mbajtjes së lëndëve narkotike me qëllim trafikimin.
Autoritetet gjyqësore kanë konfirmuar arrestimin dhe kanë vendosur ndaj të riut një masë kufizuese./Telegrafi/