Deputeti i Lidhjes Shqiptare Elmi Aziri, në një postim në Facebook ka shkruar se në Spitalin e Përgjithshëm të Kumanovës janë punësuar 80 persona, ndërsa në mesin e tyre nuk ka asnjë shqiptar.
Ai shkruan se “kjo nuk është thjesht statistikë punësimi, por është dëshmi shqetësuese e mungesës së përfaqësimit të drejtë dhe adekuat në një institucion publik”.
“Kumanova është qytet multietnik, ku shqiptarët janë pjesë e rëndësishme e strukturës demografike, shoqërore dhe ekonomike. Është e papranueshme që një institucion publik, i cili u shërben të gjithë qytetarëve pa dallim, të mos reflektojë këtë realitet në strukturën e të punësuarve. Përfaqësimi i drejtë dhe adekuat nuk është privilegj, as favor politik dhe aq më pak çështje e vullnetit të drejtuesve të institucioneve. Ai është parim kushtetues dhe detyrim institucional”.
“Prandaj, shtrohen disa pyetje legjitime: Si është e mundur që nga 80 punësime të mos ketë asnjë shqiptar? Cilat kanë qenë kriteret dhe procedurat e punësimit? A është respektuar parimi i përfaqësimit të drejtë dhe adekuat? Kush mban përgjegjësi për këtë gjendje?”.
“Qytetarët shqiptarë nuk kërkojnë privilegje. Kërkojnë barazi, dinjitet dhe mundësi të barabarta. Institucionet publike nuk janë pronë e askujt. Ato janë institucione të të gjithë qytetarëve. Heshtja përballë një situate të tillë nuk është zgjidhje. Kërkohet transparencë, përgjegjësi institucionale dhe veprim konkret për të korrigjuar këtë disproporcion. Barazia nuk matet me deklarata politike, por me përfaqësimin real në institucione”, ka shkruar Aziri./Telegrafi/