João Cancelo ka reaguar ndaj kritikave të tifozëve pas paraqitjes së vështirë në humbjen e Barcelonës nga Paris Saint-Germaini me rezultat 4-2 në Ligën e Kampionëve.
Mbrojtësi portugez, i cili luajti në krahun e majtë të mbrojtjes, pati vështirësi përballë Désiré Doué dhe u kritikua ashpër nga tifozët dhe mediat spanjolle.
Ai u ndëshkua me karton të verdhë dhe u vu në qendër të kritikave edhe për aksionin e golit të katërt të PSG-së, të shënuar nga Fabián Ruiz.
Cancelo: “Dua t’i shoh duke e përballuar presionin”
Reagimi i kritikave e shtyu Cancelo të përgjigjej përmes një postimi në Instagram.
“Nga tribunat, të gjithë janë ekspertë. Dua t’i shoh duke hyrë në fushë dhe duke e përballuar presionin”, shkroi portugezi.
Pak më vonë, ai publikoi edhe një tjetër mesazh, duke shprehur besimin në vetvete.
“Ai që nuk mund të dyshojë në veten time, jam unë”, ishte mesazhi i dytë i mbrojtësit të Barcelonës.
Flick i beson më shumë në Champions
Pavarësisht kritikave, Cancelo ka pasur më shumë hapësira në Ligën e Kampionëve sesa në La Liga.
Mbrojtësi 32-vjeçar ka qenë titullar në të tri ndeshjet e Barcelonës në Champions, ndërsa në kampionat ka nisur nga minuta e parë vetëm në dy takime.
Trajneri Hansi Flick e ka lënë në stol në dy ndeshjet e fundit të kampionatit kundër Getafes dhe Betisit. Tani, portugezi synon të reagojë në fushë pas një prej mbrëmjeve më të vështira të sezonit. /Zëri