Mjetet e qytetarëve të Kosovës në Fondin e Kursimeve Pensionale (Trusti) janë të sigurta dhe mbrohen përmes mekanizmave të vazhdueshëm të kontrollit dhe sigurisë kibernetike. Kështu ka deklaruar për Indeksonline Emanuel Bajra, Kryesues i Bordit Drejtues të Trusti Pensional i Kosovës, duke iu përgjigjur shqetësimeve lidhur me sigurinë e mjeteve pensionale pas rreziqeve të mundshme nga sulmet kibernetike ndaj institucioneve financiare.
Bajra ka theksuar se Trusti ka mekanizma të kontrollit dhe mbrojtjes që monitorohen vazhdimisht, ndërsa ka sqaruar se mjetet pensionale nuk mbahen thjesht si depozita bankare.
Ai ka bërë të ditur se një sulm eventual ndaj një banke nuk nënkupton automatikisht rrezikimin e kursimeve pensionale të qytetarëve.
Ai po ashtu tha se aktualisht Trusti ka mbi 300 milionë euro këtë vit vetëm nga kthimi, duke i marr parasysh ngritjet dhe rënien.