Jorge Jesus nuk e ka fshehur admirimin për Cristiano Ronaldon, duke e cilësuar atë si një ikonë globale dhe një shembull për futbollin portugez, pas vendimit të yllit 41-vjeçar për t’i dhënë fund aventurës me Kombëtaren.
Përzgjedhësi i Portugalisë ka publikuar një mesazh në të cilin vlerëson rëndësinë e jashtëzakonshme të Ronaldos për vendin dhe futbollin, duke zbuluar se kishte bërë gjithçka për ta bindur që të vazhdonte të ishte pjesë e skuadrës.
“Cristiano është një ikonë globale, një shembull për Portugalinë dhe Kombëtaren. Kisha vendosur një fotografi të madhe të tij në auditorin tonë, në mënyrë që të gjithë lojtarët e rinj të mund ta shihnin dhe të frymëzoheshin prej tij çdo ditë”, ka deklaruar Jesus.
Përzgjedhësi portugez nuk e ka fshehur dëshirën për ta pasur Ronaldon pranë vetes, duke pranuar se largimi i tij është një vendim që duhet respektuar.
“I kërkova të vazhdonte me mua, sepse kisha nevojë për të pranë vetes, por duhet ta pranoj vendimin e tij. Ai do të ketë gjithmonë një vend në zemrat e popullit portugez. Do të jetë gjithmonë një ikonë e futbollit portugez”, ka shtuar ai.
Reagimi i Jesusit merr një rëndësi të veçantë edhe për shkak të tensioneve që kishin lindur mes tyre gjatë grumbullimit të fundit të Portugalisë.
Përplasja ndodhi në shtator, kur Ronaldo nuk u aktivizua fare në fitoren 2-1 të Portugalisë ndaj Norvegjisë, pavarësisht se ishte dërguar për t’u nxehur gjatë ndeshjes. Sulmuesi nuk ishte i kënaqur me mënyrën se si u trajtua situata, ndërsa më pas vendosi të largohej nga grumbullimi para ndeshjes me Danimarkën.
Jesus kishte mbrojtur vendimin e tij, duke theksuar se ai ishte trajneri dhe se asnjë futbollist, pavarësisht emrit dhe statusit, nuk mund t’ia ndryshonte vendimet taktike.
Nga ana tjetër, Ronaldo publikoi një komunikatë të gjatë, në të cilën foli për një marrëveshje të prishur mes tyre dhe për mungesë besimi. Ai gjithashtu kërkoi që Federata Portugeze e Futbollit ta ndëshkonte për largimin nga grumbullimi.
Megjithatë, Jesus më pas kishte lënë të hapur mundësinë e rikthimit të Ronaldos, duke thënë se dëshironte që sulmuesi ta përfundonte karrierën ndërkombëtare ashtu siç e kishte ëndërruar vetë.
Ronaldo e mbyll aventurën me Portugalinë pas 23 vjetësh, me 234 paraqitje dhe 146 gola, duke lënë pas rekorde historike dhe tre trofe madhorë: Kampionatin Evropian të vitit 2016 dhe Ligën e Kombeve në vitet 2019 dhe 2025./Telegrafi/