Ministria e Kulturës, Rinisë dhe Sporteve (MKRS) ka reaguar lidhur me zhvillimet e fundit te Sigal Prishtina, pas zgjedhjes së Bekë Berishës në një pozitë udhëheqëse në klub, në Kuvendin e mbajtur më 14 janar 2026.
MKRS ka bërë të ditur se është njoftuar zyrtarisht për këtë vendim dhe ka rikujtuar detyrimin për respektimin e Ligjit Nr. 06/L-011 për Parandalimin e Konfliktit të Interesit, duke pasur parasysh se Berisha është deputet i zgjedhur i Kuvendit të Kosovës pas zgjedhjeve të 28 dhjetorit 2025.
Sipas këtij ligji, zyrtarët e lartë publikë mund të jenë anëtarë të organeve drejtuese të organizatave joqeveritare nga fusha e sportit, por nuk mund të ushtrojnë funksione menaxheriale, përfaqësuese apo mbikëqyrëse në persona juridikë privatë fitimprurës, as të jenë bartës të funksioneve drejtuese, siç përcaktohet në nenet 13 dhe 14 të ligjit në fjalë.
Po ashtu, ligji obligon që çdo situatë e konfliktit të interesit të parandalohet ose të zgjidhet brenda afatit prej 30 ditësh nga marrja e detyrës.
Në këtë kontekst, MKRS ka kërkuar që, pas betimit dhe marrjes së mandatit në legjislaturën e re, Bekë Berisha të ndërmarrë të gjitha masat e nevojshme brenda afateve ligjore për të shmangur çdo konflikt të interesit, në përputhje me legjislacionin në fuqi.
Ministria ka theksuar se do ta përcjellë nga afër këtë situatë dhe do të bashkëpunojë me institucionet relevante, përfshirë Agjencinë për Parandalimin e Korrupsionit, me qëllim të ruajtjes së integritetit në sport dhe respektimit të standardeve të qeverisjes së mirë./Telegrafi/