Ministri i Jashtëm iranian Abbas Araghchi ka thënë të mërkurën se “nuk ka plan” nga Irani për të varur njerëz, kur u pyet për protestat antiqeveritare në vendin e Lindjes së Mesme.
“Nuk ka asnjë plan për varje fare”, ka thënë ministri i jashtëm për Fox News. “Varja është jashtë diskutimit”, tha ai.
Sipas Shoqatës së të Drejtave të Njeriut në Iran me seli në Norvegji, varjet janë të zakonshme në burgjet iraniane.
Në një intervistë me CBS News të martën, presidenti i SHBA-së, Donald Trump, tha se do të ndërmerrte “masa shumë të forta” nëse Irani do të fillonte të varte protestuesit, por nuk dha detaje mbi komentet e tij.
“Nëse i varin, do të shihni disa gjëra”, tha Trump, përcjell Telegrafi.
Trump tha të mërkurën se i ishte thënë se vrasjet në shtypjen e protestave nga qeveria iraniane po pakësoheshin dhe se ai besonte se aktualisht nuk kishte asnjë plan për ekzekutime në shkallë të gjerë.
Siç theksojnë mediat, Trump ka qenë duke shqyrtuar një përgjigje ndaj situatës në Iran, i cili po përjeton protestat më të mëdha antiqeveritare në vite.
Ndërsa, i pyetur nga Fox News se çfarë do t’i thoshte Trump, Araghchi tha: “Mos e përsërit të njëjtin gabim që bëre në qershor”.
“Mesazhi im është: Midis luftës dhe diplomacisë, diplomacia është një mënyrë më e mirë, megjithëse nuk kemi ndonjë përvojë pozitive nga Shtetet e Bashkuara. Por prapëseprapë diplomacia është shumë më e mirë se lufta”.
Irani pati një luftë 12-ditore me aleatin e SHBA-së, Izraelin, vitin e kaluar dhe objektet e tij bërthamore u bombarduan nga ushtria amerikane në qershor.
Por protestat paraqitën një nga testet më të rënda të sundimit klerikal në vend që nga Revolucioni Islamik në vitin 1979, ndërsa ato evoluan nga ankesat për vështirësi të mëdha ekonomike në thirrje sfiduese për rënien e establishmentit klerikal të rrënjosur thellë.
Grupi i të drejtave të njeriut HRANA me seli në SHBA tha se deri më tani kishte verifikuar vdekjen e 2,403 protestuesve dhe 147 individëve të lidhur me qeverinë. HRANA raportoi 18,137 arrestime deri më tani.
Qeveria e Iranit fajëson sanksionet e huaja për vështirësitë ekonomike dhe pretendon se armiqtë e saj të huaj po ndërhyjnë në punët e brendshme. /Telegrafi/