Ministri i Punëve të Brendshme, Xhelal Sveçla, ka reaguar pasi Kosova është renditur ndër pesë vendet e para në Evropë dhe në vendin e 14-të në nivel global në Indeksin e Ligjit dhe Rendit për vitin 2025, të publikuar nga Instituti Ndërkombëtar Gallup, raporton GazetaBlic.
Përmes një postimi, Sveçla ka theksuar se Kosova ka marrë 90 pikë në perceptimin e sigurisë dhe besimit në rendin dhe ligjin, duke vlerësuar punën e institucioneve të sigurisë dhe përkushtimin e zyrtarëve të tyre.
Reagimi i plotë:
Edhe një vlerësim pozitiv për Kosovën në Indeksin e Ligjit dhe Rendit për vitin 2025.
Sipas raportit të Institutit Ndërkombëtar Gallup, në Indeksin e Ligjit dhe Rendit për vitin 2025, Republika e Kosovës renditet ndër pesë vendet e para në Evropë dhe zë vendin e 14-të në nivel global, me gjithsej 90 pikë në perceptimin e sigurisë dhe besimit në rendin dhe ligjin, duke tejkaluar kështu edhe mesataren botërore.
Ky vlerësim vjen si rezultat i punës profesionale dhe të koordinuar të institucioneve tona të sigurisë, si dhe përkushtimit të vazhdueshëm të zyrtarëve tanë në shërbim të rendit, ligjit dhe sigurisë publike. Garantimi i sigurisë së çdo qytetari mbetet prioriteti ynë, ndërsa përmes këtij angazhimi, Republika e Kosovës kontribuon drejtpërdrejt në forcimin e paqes dhe stabilitetit jo vetëm në vend, por edhe në rajon dhe në Evropë.
Me vlerësim për punën e të gjithë zyrtarëve të institucioneve të sigurisë, riafirmojmë vendosmërinë tonë për të vazhduar këtë angazhim, për të forcuar kapacitetet institucionale dhe për të garantuar një mjedis gjithnjë e më të sigurt për të gjithë qytetarët.

