Bora ka vazhduar serinë pozitive në Superligën e Kosovës në basketboll, duke e regjistruar fitoren e katërt radhazi.
Skuadra prishtinase të shtunën mbrëma, në palestrën “1 Tetori”, e mposhti Golden Eagle Yllin me rezultat 81:65, në ndeshjen e vlefshme për xhiron e nëntë.
Ylli e nisi më mirë takimin, duke e fituar çerekun e parë me rezultat 23:16. Megjithatë, Bora reagoi në dhjetëminutëshin e dytë dhe arriti ta ngushtojë epërsinë në vetëm një pikë, 35:34, rezultat me të cilin skuadrat shkuan në pushim.
Në çerekun e tretë, Bora përmbysi epërsinë dhe krijoi avantazh prej gjashtë pikësh, 58:52. Ndërsa në dhjetëminutëshin e fundit, vendasit e konfirmuan fitoren me një paraqitje bindëse.
Më i dalluari te Bora ishte Laolu Oke, me 19 pikë dhe 11 kërcime, ndërsa Muhamedali Janjeva kontribuoi me 15 pikë dhe gjashtë kërcime.
Te Golden Eagle Ylli, Lis Shoshi u veçua me dhjetë pikë, 14 kërcime dhe një asistim.
Pas kësaj fitoreje, Bora ka bilanc prej shtatë fitoreve dhe dy humbjeve, ndërsa për Yllin kjo ishte disfata e katërt e sezonit, krahas pesë fitoreve.