Festivali “Shqip Up Festival” ka përmbyllur një tjetër edicion të suksesshëm në Zvicër, ku qyteti i Cyrihut u shndërrua në epiqendrën e humorit dhe komedisë për publikun shqiptar.
Eventi i cili mbledh komedianë shqiptarë, në këtë edicion solli edhe një after-party të veçantë, ku performoi grupi i njohur “Elita 5”, duke dhuruar spektakël para një salle të mbushur me publik.
Pas përfundimit të spektaklit, drejtori i festivalit, Ridvan Murati, falënderoi të pranishmit në Cyrih, duke shprehur po ashtu edhe falënderimet e tij.
“Thjesht krenar, pa fjalë! Çfarë publiku fenomenal kemi në Zürich! Faleminderit nga zemra për dashurinë dhe energjinë që na dhuroni!”, shkroi Murati në Facebook.
Ai gjithashtu ndau disa fotografi nga festivali, i cili mblodhi një numër të madh shqiptarësh të diasporës, ndërsa komedianët u kujdesën për të sjellë humor dhe argëtim për të pranishmit.
Pas përmbylljes së edicionit në Cyrih, “Shqip Up Comedy” do të vazhdojë aktivitetin edhe në Gjermani, ku këtë vit festivali do të mbahet edhe në qytetin e Frankfurtit.
