Princesha Leonor e Spanjës u shfaq në ceremoninë e ndarjes së çmimeve Princesha e Asturias, në Oviedo, me një kostum monokrom në ngjyrë pjeshke, ku spikatën jeleku i veshur pa këmishë dhe pantallonat e gjera deri në dysheme.
Trashëgimtarja e fronit zgjodhi një xhaketë të strukturuar, pak më të gjatë, me jakë klasike, xhepa me kapak dhe kopsa.
Poshtë saj mbante një jelek në të njëjtën nuancë, duke krijuar një kombinim të pastër dhe modern.
Pamjen e plotësonin pantallonat me bel të lartë, me prerje të gjerë dhe gjatësi që mbulonte pothuajse tërësisht këpucët me majë të mprehtë dhe takë.
Leonor i mbajti flokët e gjatë të lëshuar, me onde të buta, ndërsa aksesorët minimalistë nuk ia larguan vëmendjen kostumit.
Në këtë ceremoni, princesha përshëndeti edhe fituesit e çmimeve, mes tyre futbollistin Lionel Messi, të cilit i dorëzoi një medalje para aktivitetit.
Motra e saj, Princesha Sofia, u paraqit gjithashtu me kostum dhe pantallona të gjera, por në ngjyrë bordo.
Nëna e tyre, Mbretëresha Letizia, zgjodhi një veshje të errët me bluzë blu të çelët, ndërsa Mbreti Felipe u shfaq me kostum të errët.
Çmimet Princesha e Asturias vlerësojnë çdo vit kontributet në fusha si shkenca, kultura dhe puna humanitare. /Telegrafi/
