Një shtetas gjerman është arrestuar nën dyshimin për pjesëmarrje ose organizim të grupit kriminal të organizuar, pasi nuk ka arritur të dëshmojë prejardhjen e një milion eurove të sekuestruara në pikën kufitare në Merdare.
Sipas njoftimit të PK-së thuhet se, më 23 tetor 2026, i dyshuari është paraqitur për intervistim në Prokurorinë Speciale të Republikës së Kosovës (PSRK), raporton Zeri.info.
"Rasti lidhet me 24 shkurtin e këtij viti, kur në një automjet me targa të Shqipërisë, në një hapësirë të modifikuar brenda tij, ishin gjetur dhe sekuestruar një milion euro. Gjatë intervistimit, i dyshuari ka pranuar se paratë e sekuestruara ishin të tijat, por nuk ka arritur të dëshmojë prejardhjen e tyre dhe lidhjen me personat e dyshuar që i kishin transportuar", thuhet në njoftimin e PK-së.
Me vendim të prokurorit, i dyshuari është arrestuar dhe dërguar në mbajtje. /Zëri