Komisioni Qendror i Zgjedhjeve i Izraelit ka ndaluar të gjitha partitë kryesore arabe të marrin pjesë në zgjedhjet parlamentare të 27 tetorit.
Nëse Gjykata Supreme nuk e rrëzon këtë vendim, qytetarët arabë të Izraelit, të cilët përbëjnë rreth një të pestën e popullsisë, do të mbeten pa përfaqësuesit e tyre kryesorë politikë në Knesset.
Ndalimi vlen për Ra’am, përkatësisht Listën e Bashkuar Arabe, si dhe për Listën e Përbashkët, koalicion i Hadash, Ta’al dhe Balad. Komisioni ka ndaluar kandidimin edhe të dy politikanëve nga Lista e Përbashkët, kryetarit të Baladit, Sami Abu Shehadeh, dhe deputetit të Hadashit, Ofer Cassif, raportojnë mediat.
Për ndalimin e Ra’am dhe Listës së Përbashkët votuan 18 anëtarë të komisionit, ndërsa pesë ishin kundër. Komisioni përbëhet nga përfaqësues të partive të legjislaturës në largim të Knessetit, ndaj një numër i madh i anëtarëve të tij janë nga Likud i kryeministrit Benjamin Netanyahu.
Një ditë më vonë, komisioni hodhi poshtë kërkesën për ndalimin e partisë së ekstremit të djathtë Otzma Yehudit të ministrit të Sigurisë Kombëtare, Itamar Ben-Gvir. Fjalën përfundimtare për listat arabe do ta ketë Gjykata Supreme, së cilës partitë do t’i drejtohen me ankesë.
Pse kërkohet përjashtimi i tyre nga zgjedhjet?
Kërkesat për ndalimin e tyre u iniciuan nga partitë e së djathtës izraelite, mes tyre Likud dhe Otzma Yehudit. Ato iu referuan Ligjit Themelor për Knessetin, sipas të cilit kandidatura mund t’u ndalohet atyre që mohojnë Izraelin si shtet hebre dhe demokratik, nxisin racizëm ose mbështesin luftën e armatosur kundër Izraelit.
Kundërshtarët e Ra’am kanë përmendur lidhjet e pretenduara të organizatave të lidhura me partinë me struktura pranë Hamasit, si dhe deklaratat e liderit të saj, Mansour Abbas. Peticionet kundër Abu Shehadehut dhe Cassifit gjithashtu bazohen në deklaratat e tyre të mëparshme dhe qëndrimet politike.
Ra’am dhe Lista e Përbashkët i kanë hedhur poshtë akuzat. Ra’am thekson se Abbas e ka dënuar sulmin e Hamasit të 7 tetorit 2023, ndërsa Lista e Përbashkët pretendon se qëllimi i ndalimit është përjashtimi politik i më shumë se një milion qytetarëve arabë të Izraelit.
Gjykata Supreme
Përpjekje të ngjashme ka pasur edhe më herët, por asnjëherë në këtë përmasë. Baladit i është ndaluar pjesëmarrja në zgjedhje në vitet 2003, 2009, 2019 dhe 2022, por Gjykata Supreme e ka rrëzuar vendimin çdo herë. Edhe ndalimi i Cassifit në vitin 2019 ishte rrëzuar.
Që nga ndryshimi i ligjit në vitin 1985, Gjykata Supreme ka konfirmuar vetëm një ndalim të një liste politike, atë kundër partisë ultranacionaliste hebraike ortodokse Kach në vitin 1988.
Për këtë arsye, vendimi i Gjykatës Supreme në ditët në vijim do të përcaktojë nëse ndalimi i partive arabe do të mbetet në fuqi për zgjedhjet e 27 tetorit. /Telegrafi/