Hulumtuesi i organizatës “Mendimi i Ri Politik Serb” (NSPM), Gjorgje Vukadinoviq, ka thënë se, bazuar në hulumtimin e opinionit publik të realizuar në shtator, Serbia po i afrohet një atmosfere referendumi në zgjedhjet e parakohshme parlamentare që pritet të mbahen më 25 tetor.
“Dy aktorë kanë arsye për të qenë të kënaqur, ndërsa pothuajse askush tjetër. Bëhet fjalë për partinë në pushtet dhe ‘Studentët fitojnë’. Ata janë rritur dhe kanë kaluar 40 për qind”, ka thënë Vukadinoviq për televizionin N1.
Ai ka deklaruar se “studentët janë rritur pak më shumë, duke arritur në 44.4 për qind, ndërsa Serbia e Bashkuar në 41.7 për qind”. Në hulumtimin e mëparshëm, Lista e Studentëve kishte 39.6 për qind, ndërsa Serbia e Bashkuar 37.5 për qind.
Sipas Vukadinoviqit, pyetja është nëse ekziston një faktor i tretë, duke iu referuar partive opozitare që garojnë të vetme në zgjedhje.
“Po krijohet një atmosferë referendumi dhe kjo i rrezikon të gjithë të tjerët. Edhe ata që janë satelitë të afërt me pushtetin, pjesë e pushtetit, apo opozitën që përpiqet të garojë e vetme. Mendoj për DSS-në e Re dhe Serbinë Evropiane”, ka thënë ai.
Ai shtoi se Partia Socialiste e Serbisë (SPS) gjithashtu ka probleme, por aktualisht në përmasa shumë më të vogla.
Vukadinoviq theksoi se hulumtimi është realizuar në fillim të shtatorit, pra para mbledhjes së nënshkrimeve dhe pritjeve në radhë për mbështetjen e studentëve, para dorëzimit të nënshkrimeve, si dhe para tërheqjes së “Serbisë Popullore” nga gara e pavarur.
Hulumtimi është zhvilluar gjithashtu para përçarjes brenda lëvizjes së Branimir Nestoroviqit “Ne – Forca e Popullit” dhe gjatë procesit të përjashtimit të Branko Ruzhiqit nga Partia Socialiste e Serbisë.
Në atë kohë, gjithashtu ishin publikuar emrat në Listën e Studentëve, ndërsa rektori Vladan Gjokiq dhe profesori Milo Lompar ishin refuzuar.
Vukadinoviq theksoi se të gjithë këta faktorë mund t’i kenë ndryshuar sërish përqindjet e regjistruara në hulumtimin e shtatorit. /Telegrafi/