Barcelona ka marrë një sinjal shumë pozitiv në përpjekjet për transferimin e Rodrit, pasi mesfushori i Manchester Cityt raportohet se ka dhënë dritën jeshile për t’u transferuar në “Camp Nou”.
Sipas raportimit të Jijantes FC, edhe pse për një kohë të gjatë dukej se destinacioni i ardhshëm i fituesit të Topit të Artë do të ishte Real Madridi, situata ka ndryshuar plotësisht në favor të katalunasve.
Barcelona ka intensifikuar kontaktet pasi mësoi se negociatat mes Rodrit dhe Real Madridit kanë ngecur. Trajneri Hansi Flick thuhet se ka kontaktuar personalisht mesfushorin spanjoll për t’ia shpjeguar projektin sportiv të klubit dhe rolin që do të kishte në skuadër.
Pas këtyre zhvillimeve, Barcelona pritet të paraqesë ofertën e saj të parë zyrtare për Manchester Cityn. Klubi anglez, megjithatë, nuk është i gatshëm ta lërë të lirë lojtarin për më pak se 60 milionë euro.
Ndryshimi i prioriteteve të Barcelonës në merkato lidhet ngushtë me lëndimin e rëndë të Frenkie de Jongut, i cili ka detyruar drejtuesit të kërkojnë një zëvendësues të nivelit të lartë në mesfushë. Po ashtu, dështimi për të arritur një marrëveshje me Atletico Madridin për Julian Alvarezin ka bërë që katalunasit ta përqendrojnë vëmendjen te Rodri.
Mesfushori spanjoll vjen pas një sezoni të jashtëzakonshëm në nivel ndërkombëtar, duke udhëhequr Spanjën drejt triumfit në Kupën e Botës 2026 dhe duke u shpallur lojtari më i mirë i turneut./Telegrafi/