Presidenti ukrainas, Volodymyr Zelensky, akuzoi Rusinë për sulme ndaj infrastrukturës energjetike të Ukrainës, pak orë pasi presidenti amerikan, Donald Trump, njoftoi se Moska dhe Kievi kishin rënë dakord për një armëpushim të menjëhershëm në këtë sektor.
Zelensky deklaroi se një central energjetik në Kharkiv u godit pas njoftimit të Trumpit, duke vënë në pikëpyetje zbatimin e marrëveshjes së pretenduar.
“Është e qartë se Putini nuk e lexon Truth Social”, u shpreh Zelensky, duke iu referuar platformës së rrjeteve sociale të presidentit amerikan.
Trumpi njoftoi të dielën se Rusia dhe Ukraina kishin rënë dakord të ndalonin sulmet ndaj infrastrukturës energjetike, por nuk dha hollësi mbi kushtet e marrëveshjes. Deri më tani, Kremlini nuk ka konfirmuar zyrtarisht pranimin e armëpushimit.
Zelensky tha se Ukraina është e gatshme të ndalojë sulmet ndaj objekteve energjetike ruse, nëse Moska ndërmerr të njëjtin angazhim. Sipas tij, një marrëveshje e tillë mund të përbëjë “një hap të rëndësishëm drejt përfundimit të luftës”.
Nga ana tjetër, zëdhënësi i Kremlinit, Dmitry Peskov, deklaroi se autoritetet ruse do të informojnë publikun kur të kenë diçka konkrete për të komunikuar lidhur me këtë çështje.
Trump ka ushtruar presion ndaj Ukrainës për të ndalur sulmet ndaj infrastrukturës ruse të naftës, në mënyrë që Moska të përmbushë një marrëveshje të arritur së fundmi për furnizimin me naftë dizel të SHBA-së dhe tregut ndërkombëtar.
Ndërkohë, Rusia ka intensifikuar sulmet ndaj infrastrukturës energjetike ukrainase gjatë dimrave që prej nisjes së pushtimit në shkallë të gjerë në shkurt të vitit 2022, duke shkaktuar ndërprerje të furnizimit me energji elektrike dhe duke shtuar shqetësimet për furnizimin me ngrohje gjatë muajve të ftohtë.
Armëpushimi energjetik mbetet i paqartë, ndërsa palët nuk kanë konfirmuar ende një mekanizëm të përbashkët për zbatimin e tij. /atsh