KORREKT / SOT16 nëntor 2026
Botimi digjital / Kontakt
KORREKT PRESS

QARTË. ÇDO DITË.Lajmet që kanë rëndësi.

KORREKT PRESS / KËRKIM

Gjej lajmin që të intereson.

Shkruaj të paktën 2 shkronja për të kërkuar në titujt e lajmeve.

Rezultate gjatë shkrimit
Ekonomi

“U dëmtua buxheti rreth 3 milionë euro”, Apeli refuzon ankesat e mbrojtjes në rastin e rezervave shtetërore

“U dëmtua buxheti rreth 3 milionë euro”, Apeli refuzon ankesat e mbrojtjes në rastin e rezervave shtetërore

Gjykata e Apelit ka refuzuar ankesat e mbrojtjes, duke lënë në fuqi vendimin e Gjykatës Themelore në Prishtinë, e cila kishte konfirmuar aktakuzën ndaj ish-ministres së Industrisë, Ndërmarrësisë dhe Tregtisë, Rozeta Hajdari, si dhe Irfan Lipovica, Hafiz Gara e Ridvan Muharremi.

Apeli këtë vendim e ka marrë më 13 nëntor të këtij viti në rastin e njohur të rezervave shtetërore.

Ish-ministrja Hajdari, ish-zëvendëssekretari i MINT, Irfan Lipovica, si dhe drejtori i Departamentit të Rezervave Shtetërore në MINT, Hafiz Gara, akuzohen për kryerjen e veprave penale “Keqpërdorim i pozitës apo autoritetit zyrtar” dhe për “Zbulim të fshehtësisë zyrtare”.

Ndërsa, afaristin Ridvan Muharremi i njohur si “Ridi”, PSRK-ja po e akuzon për kryerjen e veprës penale “Ndihmë në kryerjen e veprës penale të keqpërdorimit të pozitës apo autoritetit zyrtar”.

Sipas Apelit, vendimin e së cilit e ka siguruar Klan Kosova, ekziston dyshimi i bazuar mirë se Hajdari dhe të tjerët i kanë shkaktuar dëm buxhetit të Republikës së Kosovës prej 2.912.134.28 euro.

"Ekziston dyshimi i bazuar mirë, se si pasojë e veprimeve të kundërligjshme të të pandehurve, të përshkruara si në aktakuzën e Prokurorisë, buxhetit të Republikës së Kosovës i është shkaktuar dëm financiar në shumën e përgjithshme prej 2.912.134,28 euro.", thuhet në vendim.

Në vendimin e Gjykatës së Apelit me të cilin janë refezuar ankesat e mbrojtësve të të akuzuarve Rozeta Hajdari, Irfan Lipovica dhe Hafiz Gara, ndaj aktvendimit të Themelores për vërtetimin e aktakuzës së PSRK-së, thuhet se nuk janë evidentuar shkelje esenciale të dispozitave të procedurës penale e as shkelje të Ligjit Penal.

Sipas Apelit, aktvendimi i Themelores është i drejtë dhe i bazuar në ligj.

Po ashtu, në vendim thuhet se gjykata e shkallës së parë e ka arsyetuar në mënyrë të mjaftueshme ekzistimin e dyshimit të bazuar mirë në raport me veprat penale dhe të pandehurit.

Ndër tjerash, thuhet se Kolegji i Apelit, ka vërejtur se në aktvendimin e ankimuar, shkalla e parë ka theksuar edhe provat mbi të cilat e ka mbështetur konstatimin lidhur me gjetjet për ekzistimin e dyshimit të bazuar mirë se të pandehurit kanë kryer vperat penale për të cilat ngarkohen.

Sipas Apelit, pretendimi i mbrojtjes se provat e mbledhura nuk përbëjnë bazë të mjaftueshme për të mbështetur dyshimin e bazuar mirë ndaj të pandehurve është i pabazuar, pasi që nga provat e paraqitura në aktakuzë rezulton se ky standard është përmbushur.

Po ashtu, kolegji i Apelit nuk ka gjetur se ndonjëra nga provat mbi të cilat mbështetet aktakuza është marrë në kundërshtim me ligjin apo se gjatë mbledhjes së tyre janë shkelur dispozitat e Kodit të Procedurës Penale, si dhe nuk ka identifikuar ndonjë provë të papranueshme që do të duhej të përjashtohej nga procedura.

Në vendimin e Apelit, thuhet se përkundër faktit që me Vendimin e Qeverisë së Republikës së Kosovës të datës 26 shkurt 2022, ishte vendosur përjashtimi nga procedurat e prokurorimit publik, blerja e produketeve për rezervat shtetërore dhe klasifikimi i lëndës së kontratës si “sekret”, natyra e kësaj procedure duhet të vlerësohet në kontekst të dipozitave të Ligjit për Rezervat Shtetërore të Mallrave, e që sipas nenit 19 të këtij ligji, furnizimi me mallrat e parapara në Programin Vjetor realizohet përmes proceudrave të prokurimit publik, ndërsa neni 20 përcakton se blerja e artikujve për rezervat shtetërore duhet të bëhet përmes procedurave të hapura të prokurimit publik.

Ndërkaq, theksohet se neni 9 përcakton se sekret shtetëror konsiderohen vetëm Plani Strategjik, Programi Vjetor dhe vendndodhja e rezervave shtetërore.

Andaj, sipas Apelit, sigurimi dhe qasja në këto dokumente nga Prokuroria dhe Policia si dhe shqyrtimi i tyre nga gjykata në kuadër të procedurës penale, nuk përbëjnë në asnjë mënyrë cenim të sekretit shtetëror apo zbulim të paautorizuar të informacionit të klasifikuar.   

Lista jote

Lexo më vonë.

Artikujt e ruajtur në këtë pajisje.

Ende nuk ke ruajtur artikuj. Hap një lajm dhe shtyp “Ruaj”, për ta lexuar më vonë.