Gazetarëve të CNN, Politico dhe MS NOW u është mohuar hyrja në Shtëpinë e Bardhë, pasi presidenti amerikan Donald Trump njoftoi se do t’i ndalonte këto media, duke i akuzuar për publikimin e “fiksioneve dhe gënjeshtrave” për administratën e tij.
Të shtunën, një gazetare dhe një fotograf i MS NOW tentuan të hynin në kompleksin e Shtëpisë së Bardhë, por kartat e tyre të akreditimit nuk funksionuan dhe u konfiskuan nga një oficer.
Edhe gazetarët e CNN dhe Politico raportuan se iu mohua hyrja dhe iu morën kartat e aksesit. Një agjent i Shërbimit Sekret i tha gazetares së CNN, Betsy Klein, se akreditimi i saj ishte çaktivizuar.
Trump tha se vendimi ishte rezultat i raportimeve të akumuluara gjatë viteve, pa përmendur një artikull apo raportim specifik. Ai paralajmëroi gjithashtu se mund të ketë media të tjera që do t’i nënshtrohen masave të ngjashme.
Të tre mediat e kanë kundërshtuar vendimin, duke argumentuar se ai cenon të drejtën kushtetuese për lirinë e shtypit, transmeton Telegrafi.
White House Correspondents’ Association (WHCA) i bëri thirrje administratës që të rikthejë menjëherë aksesin e gazetarëve, duke paralajmëruar se një standard i tillë mund të përdoret edhe kundër mediave të tjera.
Ndërkohë, Reporters Committee for Freedom of the Press e cilësoi ndalimin si antikushtetues dhe tha se Shtëpia e Bardhë nuk mund të përjashtojë gazetarët për shkak të përmbajtjes së raportimeve të tyre.
Vendimi është pjesë e një serie përplasjesh mes administratës Trump dhe mediave që presidenti i ka kritikuar. Administrata është përfshirë gjithashtu në procese gjyqësore me media amerikane dhe ndërkombëtare, përfshirë The New York Times, The Wall Street Journal dhe BBC. /Telegrafi/