Ndarja nga jeta e artistes Rinesa Qeriqi, e njohur si Rinesancë, ka prekur edhe reperen Tayna, me të cilën ajo bashkëpunoi në këngën Nata, pjesë e albumit Genesis.
Përmes disa postimeve në rrjetet sociale, Tayna shprehu dhimbjen për humbjen e artistes, duke treguar se e vlerësonte prej kohësh për talentin, sinqeritetin dhe mënyrën e veçantë të të bërit muzikë.
Ajo kujtoi se, kur kishte vendosur të bashkëpunonte me artistë të rinj, Rinesa ishte ndër emrat e parë që i kishin ardhur në mendje.
Reperja tregoi se Rinesa i kishte dërguar disa këngë nga albumi i saj, të cilat e kishin mahnitur. Tayna vlerësoi gjithashtu përkushtimin e saj dhe faktin që krijimtaria e artistes kishte një identitet të veçantë.
Në mesazhin e saj, Tayna e përshkroi Rinesën si një artiste shumë përpara kohës së saj, si në shkrim e mendim, ashtu edhe në muzikë.
Ajo e cilësoi si një botë më vete dhe shprehu keqardhjen që nuk pati mundësinë ta takonte nga afër.
Tayna zbuloi se ditët e fundit e kishte pasur shpesh në mendje dhe ishte shqetësuar për të, por lajmi për vdekjen e saj e kishte tronditur.
Në fund, reperja i kushtoi një mesazh lamtumire mikeshës së saj, duke e kujtuar me dashuri dhe respekt. /Telegrafi/
