Shefi i Grupit Parlamentar të Partisë Demokratike të Kosovës (PDK), Arian Tahiri, gjatë seancës së Kuvendit ku po diskutohet Raporti i Komisionit Evropian për Kosovën për vitin 2026, ka kritikuar gjendjen institucionale dhe ritmin e reformave në vend.
Tahiri ka thënë se raporti i Komisionit Evropian nuk duhet të shihet si dokument i ndonjë partie politike, por si një vlerësim i progresit të Republikës së Kosovës.
“Raporti i Komisionit Evropian për vitin 2026 nuk është dokument i opozitës, nuk është dokument i PDK-së, i LDK-së, i Aleancës. Nuk është shkruar për t’i shërbyer interesit të asnjë partie politike, është një vlerësim i progresit të Republikës së Kosovës”, ka deklaruar Tahiri.
Ai ka theksuar se gjetjet e raportit duhet të trajtohen me seriozitet dhe përgjegjësi, veçanërisht kur institucionet evropiane evidentojnë mangësi në demokraci, drejtësi, ekonomi dhe funksionimin e institucioneve.
Sipas Tahirit, përgjigjja e një qeverie serioze ndaj këtyre vlerësimeve duhet të jetë reflektimi dhe marrja e përgjegjësisë, e jo arsyetimi apo propaganda.
“Përgjigjja e një qeverie serioze nuk mund të jetë arsyetimi, duhet të jetë reflektimi. Nuk mund të jetë propaganda, duhet të jetë përgjegjësia”, ka thënë ai.
Më tej, Tahiri ka përmendur edhe disa nga gjetjet që, sipas tij, duhet të shqetësojnë qytetarët, duke veçuar paralizën e zgjatur institucionale, dobësimin e mekanizmave të kontrollit dhe mbikëqyrjen e kufizuar të ekzekutivit.
Ai ka vlerësuar se këto nuk janë vetëm vërejtje teknike, por paralajmërime për cilësinë e demokracisë në Kosovë.
“Demokracia matet me mënyrën se si ushtrohet pushteti mes dy palëve, matet me respektimin e Kushtetutës, me funksionimin e Kuvendit, me pavarësinë e institucioneve dhe gatishmërinë e shumicës për t’u përgjigjur para qytetarëve”, ka deklaruar Tahiri. /Lajmi.net/