Suzanna Shkreli shpalli kandidaturën për Sekretare të Shtetit në Michigan si përfaqësuese e Partisë Demokratike.
“Prindërit e mi erdhën në këtë vend për të shpëtuar nga autoritarizmi. Tani, ndërsa këto kërcënime po shfaqen edhe këtu, jam e gatshme të mbroj demokracinë tonë, të mbroj Kushtetutën dhe të siguroj të drejtën e votës për çdo banor të Michiganit”, deklaroi Shkreli.
Kandidatura e saj vjen në një kohë kur mbrojtja e të drejtave zgjedhore dhe ruajtja e institucioneve demokratike janë në qendër të debatit politik në Shtetet e Bashkuara.
Ndryshe, Suzanna ka ndërtuar një karrierë të respektuar në shërbim publik, dhe vendimi i saj për të kandiduar për një nga postet më të larta shtetërore në Michigan reflekton praninë në rritje, talentin dhe lidershipin e shqiptarëve në jetën publike të SHBA-së.
Ajo ishte shqiptarja e vetme që kishte kandiduar për Kongresin Amerikan në vitin 2016, por nuk arriti të merrte votat e nevojshme.
Shkreli kishte marrë mbështetje nga familja Clinton gjatë garës për postin e kongresistes nga radhët e demokratëve. /Telegrafi/