Sofja zyrtare ka pranuar kërkesën e Ministrisë së Punëve të Jashtme të Maqedonisë së Veriut për takim mes dy vendeve në margjinat e mbledhjes për korridorin 8 gjatë ditës së nesërme në Sofje. Megjithatë, mënyra dhe formati i takimit ende nuk është konfirmuar. Ka mbetur të shihet nëse do të jetë takim i organizuar dypalësh apo takim i shkurtër.
“Po gjatë ditës së djeshme morëm konfirmim zyrtar për takim bilateral por do të shohim në çfarë formati dhe si do të duket, a do të jetë pull-aside apo bilaterale në margjinat e samitit për Korridorin 8. Mesazhet tona janë të qarta. Vetëm me dialog mund të vijmë te zgjidhja e kësaj gjendjeje në të cilën për momentin ndodhemi. Se ne jemi për marrëdhënie të mira fqinjësore dhe duam sa më shpejtë të realizojmë qëllimin tonë strategjik të jemi pjesë e Bashkimit Evropian, diçka që moti e kemi merituar”, deklaroi kryeministri Hristijan Mickoski.
Mickoski vazhdon të jetë i bindur se Bullgaria po keqpërdorë pozitën e saj si anëtare e BE-së duke vendosur veto për çështje bilaterale dhe nuk e vlerëson reformat dhe përparimin e vendit. Sipas kryeministrit, ajo që frymëzon është plani për integrim gradual ku kërkohen tre kushte, dy prej të cilave vendi i ka plotësuar e njëra duhet të konfirmohet më tej nga BE-ja.
Ditë më parë presidentja bullgare Ilijana Jotova i bëri thirrje kryeministrit Mickoski që edhe njëherë të shqyrtojë dhe mësojë politikat evropiane nga afër si dhe kontestin mes dy vendeve mos ta paraqesë si çështje bilaterale. Për këtë Mickoski ia ktheu se vlerat evropiane i ka harruar pikërisht Bullgaria pasi u bë anëtare e BE-së.
“Faleminderit për këshillën. Unë rininë time kam kaluar shumë vite në Bashkimin Evropian dhe unë e kam shumë të qartë BE-në, i kam të qarta vlerat e Adenauer, Shuman dhe De Gasperi por supozoj se disa nga vendet anëtare të cilët janë komod në karriget në Bruksel i harruan pasi u bënë vende anëtare”, shtoi Mickoski.
Takimi në Bullgari është paraparë të mbahet mes ministrave të jashtëm të dy vendeve, Timço Mucunski dhe Velislava Petrova Çamova. Takimi u inicua me kërkesë të kryetares së Komisionit Evropian Ursula Von der Leyen, pas vizitës së saj javën e kaluar në Shkup./Alsat/