Një 26-vjeçare, e arrestuar nën dyshimin për trafikim të narkotikëve në grupin ku dyshohet se bën pjesë edhe ish-ministri Astrit Haraqija, është sjellë sot në Pallatin e Drejtësisë në Prishtinë.
IndeksOnline ka siguruar pamje nga momenti i futjes së saj në objektin e Gjykatës, ku pritet të mbahet seanca ndaj saj dhe të dyshuarve të tjerë.
Arrestimet janë kryer më 14 nëntor, gjatë operacionit policor të koduar “Heshtja”, i cili kishte në shënjestër një grup të dyshuar për trafikim dhe shpërndarje të kokainës.
Gjatë operacionit janë arrestuar gjashtë persona, ndërsa janë sekuestruar rreth 1.6 kilogramë kokainë, para të gatshme, vetura luksoze dhe prova të tjera materiale.
Sipas Policisë, vlera e përgjithshme e drogës dhe aseteve të sekuestruara arrin në rreth 301 mijë euro.
Hetimet për rastin janë duke vazhduar./IndeksOnline/

